‘धेवा ज्वना स्वर्गे वने दैमखु”
रमेश मान महर्जन
सुइतहे मनु गणय याइ मखुपिं
धेवाय जकहे मिखां तया जुइपिं
करकिया बुई छेदना इम्स
उल्टा इम्तहे ख्यायगु स्वपिं
ख्वा दुपिं व पापीत धर्म मदुपिं
ग्यापिन्तला सातुहे कायगु स्वैपिं
लाज शर्म धैगु छुहे म्वापिं
न्यासः यात न्यादो याना नैपिं
दलाल जुया धेवा कमाय याइपिं
कतपिनेगु जग्गा थगु नामय यायगु स्वैपिं
गरिव तयत हवाय हवाय ख्वयका
धनि तयत पोसय यायगु स्वैपिं
सत्य खं गवले ल्हाइहेमखुपिं
दाजु किजा तताके स्याना नैपिं
चो पो मदयक खः ल्हाना
थगु जकहे फाइदा स्वया जुइपिं
हाकिमत धाकहे ल्हातय काइपिं
सास्याना धुं पोसय यायगु स्वैपिं
थगु निजी स्वार्थ पुरा यायगु लागि
झीतला तुनामक्तीहे यायगु स्वैपिं
थ मनुदु धका फाय फुइ याना जुइपिं
देशय गवले च्वनि मखुपिं
चों चोंहे ज्याख सिधयका
झीतला च्याम्पति हिकेथे हीकिइपिं
दक दिकहे शक्ति छेल्ये फुपी
कोठाय चोनाहे जग्गा पास याइपि
म होलेथे धेवा होला इम्स
धेवां जकहे ज्या याना जुइपिं
फोगित धापिं धाक सिगुहे
म्वा म्वा हि तोनेगु स्वैपिं
इमिगु दकदिक सम्पति लाका
सुकुम्वासी याना छवयगु स्वैपिं
आखिर गरिव सिइसाँ धनित सिइसा
किःत इम्त थुनाछवै कि उना छवै
धनि धका धन कुबिया वनि मखु
गरिव धका धन विया छवै मखु
फुइकं च्वनीपिन्स तुइंक जक स्वै
पोजय च्वना मोज मस्ति यायगु स्वै
भिटो शक्ति लगय याना इम्स
त्वह मदु त्वहतया दुःख पिइगु स्वै
मनुनं मनु म्हमसिलकि इम्स
कन्हे वना न्हासे लुफि हाइ
चां छ म्ह न्ही छम्ह वैपिन्स
सत्य असत्य छुटय याइ
धाथे जुजु जक मदुगु देश मखुत
न्याय निसाफ हे मदय धुंकल
लाल पुर्जा झीइके छेःबुं इम्के
ऐसां सहयाना च्वने मागु जुल
अन्याय जुलमाइ धोर अत्याचार जुल
धेवांहे चलखेल याइगु जुल
गरिव धाकहे सीइसा जिल
शोषक तयगु जक थन राज जुल
कलियुग धैगु थ्वहे मखुला
भौचिया न्हयोने छुंचात ख्वयथे
ज्याजि मदयका म्वाना च्वने मालकि
न्हयागुहे व्यवस्था वसाँ जिइमखुथें
युक्रेन, पालिस्टाइन या जनताथे
झी नेपामीतन म्वा म्वा सिना च्वन
स्याय पालेत झीके ल्वाव मदु
नय त्वनेत झीके धेवा मदु
सताय वंः वपिंहे भ्रष्टया भ्रष्टत
धेवा व पदय विकय जुया च्वन
झी गरिवया दिन गवले वैधका
नय मखपिं वाय वाय कना च्वन
व भ्रष्ट व दलाल तयसं याना
द्र्योहे वसाँ राक्षस याइगु जुया च्वन
भष्टाचारीतयत वचय यायत
न्हयागुहे याइगु जुया च्वन
शोषक व धेवा बालत धैपिला
जनताया माहा सत्रुहे जुया च्वन
इम्सला थः वाहेक सुइतहे थन
भिं भलाइ याइ मखुपिं जुया च्वन
इपि फसाँ फकहे झीत ख्यायत स्वैपिं
नेपा देशंहे पितना छवयमापि
गबले तक इम्स शाशन याना च्वनि
अवले तक झी जनतां सुख सिइमखुनि
थ्वहे खः झी सकसिनं मनय तया
सकले झीपिं छपं छधि जुइमाल
व जनता स्याना नैपिन्त
हाकुं तिना छवयगु स्वय माल
चाहे व साहु जुइमा गरिवहे छाय मजुइमा
झी सकसिनं नयगुला जाहे ख
सिना वनकि न्हयाम्हहे थजुइमा
उना छवय धुंका चाहे ख
गणतन्त्र धागु शोषक तयगु जक मखु
झी किसान मज्दुर तयगु लागिनं ख
अन्याय याना कमाय याना तयव जक
धेवा ज्वना स्वर्गे वने दैमखु स्व
....
No comments:
Post a Comment