नेपालभाषां च्वयाहयागु जिगु जेल डायरी गथे खः अथे हे थन न्ह्यब्वया च्वना
२०६८/०१/११ आइतवार २४ अप्रैल २०११ २०० दिन
म्हिगः न्हापलाक्क द्यनागुलिं ला छु थें थांै ४ ताः इलय् हे न्ह्यलं चाल । पिने झारा च्वं वना । झारा मवः हावा जक वल । अनं डाँडाय् वना चुरोट च्याका त्वना । थौं थ्व डाँडाय् चुरोट त्वंपिं मेपिं सुं मदु । जि याकःचा सुईं सुईं चुरोट सालाः चुरोटया कुँ ल्ह्वया च्वना । चुरोटया कुँ ब्वयाः वंथें जिगु मननं ब्वयाःवन ।
ओहो १ छन्हू निन्हू धाधां, थौंकन्हय् धाधां जि थ्व थासय् (भद्रवन्दी गृह) वयागु नं २०० न्हूदिं दयेधुंकल । झिंप्यन्हू हनुमान ढोका प्रहरी खोरय् च्वनागु ल्याखाय्बलय् ला न्हय्ला फुइधुंकल । जिं विचाः यानागु स्वयाः ५० न्यन्हू दिं अप्वः च्वनेमाल । न्हापांला जिं बिचाः यानागु खः अदालती कारवाही क्वचाय्त न्याला बी । सफाई कयाः पिहाँ वने द हे दइ । थौं निसः न्हू दत अयनं गबले छेँय् वने दइ ठेगान दुगु मखु । थ्व थासय् दुहाँ वये अःपु, पिहाँ वने तसकं थाकु । उकिं थौंकन्हय् जिगु मन तसकं उदास उदास जुया च्वन ।
जि ख्वाः सिला द्यःभागी याना कोथाय् वया डायरी च्वया । न्याताः ई जुल । चेकिंग वल । नम्बर चाल । हानं प्वाः धुस्स मिन । झारा च्वं वना । झारा मवः हावा जक वल । हानं कोथाय् वया कफी दयेका त्वना । पिने चाःहयू वना । लुखा चाल, दुरु वल धकाः माईकं सुचं बिल । होटलय् वना च्या त्वं वना । च्या त्वनाः डाँडाय् वना चुरोट च्याकाः त्वना । उगु हे इलय् ओमशान्ति वनेत माईकं इनाप यात । सु भाइजी वःगु जुइ धकाः च्वना । सुं नं वःगु मखना । जि कोथाय् वया । थौं नं जि म्हसुख मदु । उकिं ओमशान्ति मवनेगु विचाः याना लासाय् ग्वारतुला च्वना ।
आकाझाकां माईकं न्वंवाना हल, “नम्बर भयो, नम्बर भयो । सबैजना आ–आफ्नो नम्बरमा गैदिनु होला ।” जि झसंग वन । जित च्वफाय्ला खिफाय्ला थें जुल । छकलं च्वफाय् तांन्वल । जि पिने वना । भाइ नाईकें पिहां वनेमते धाःसा च्वफाय् हथाय् जुल धकाः तुरुन्त वये धकाः वना । पिने मनूत मदु सुनसान जुइ धुंकल । सकलें थःथःगु थासय् वने धुंकल । च्वफाना च्वं च्वं हे पिने झिझां मिझां दंगु थें जुल । छु जूगु खः जिगु मन पि पि च्यात । नुगलय् ग्या चिकुं भुन । च्वफाना ब्वाँय ब्वाँय् कोथाय् वया । कोथाय् सकलें थःथःगु थासय् न्वंनिं मवाःसे सुम्क च्वनाच्वन । जि नं थःगु लासाय् ग्वारतुला च्वना ।
पलख जाःबलय् जिमिगु नम्बरयां च्वय्च्वंगु छेँय् मनूत हारहूर संगु व कालकुल हासः वल । पिनेथासं प्रहरीत आकाझाकां चेकिंग वइबलय् थथे सुथय् हे नम्बर जुइगु खः । चेकिंग याःबलय् सुयागुं ब्यागं हात हतियार लुया वलजुइ । व मनूयात ज्वना यंकल जुइ धकाः च्वना । आः जिमिगु कोथाय् वइगु जुइ धकाः च्वना । बाघौ जाल जिमिगु कोथाय् सुं नं मवः । “नम्बर खुल्यो, नम्बर खुल्यो” धकाः माईकं धया हल । जि छक्क जुया चेकिंग हे मयाःसे नम्बर चायेकल । पिने वना । पिने छकलं मनूत गः गः खनेदत । च्वफाय्थाय् मनूत गःगः थःगु पाः कायेत झ्वःछुनाच्वन । खिफाय् थाय्नं अथे हे । अहो १ बाघौ जक बन्द जूबलय् थुज्वःगु अवस्था । चुरोट त्वनेगु डाँडाय् वना । अन नं मनूत गःगः दु । तर सुनानं छसः न्वंवाःगु मखु । सकसिया ख्वालय् नं ग्याः चिकुं भुनाः तःगु दु ।
लिपा सिल लक्ष्मण थापा मगर धाःम्ह छम्ह बन्दिं खेलकुद नायःलिसे ल्हाः वाना ल्वात । अले निरंजन पौडेल धाःम्ह पासा बः काल । नाईके दाइनं नं थः पासा सःतल । अले नायःत फुक्क जाना इपिं निम्हेसित दायेतः नम्बर लगय् याःगु जुयाच्वन । आः इमित ठूलो चौकी यंगु दु । गुलि जक दाइगु जुइ । निम्हं्र मशहुरपिं मनू स्यानावःपिं । उखुन्हु दुई नम्बर भान्साय् लक्ष्मण धाःम्हं पार्टी भ्वय् ब्यूगु । वयागु पार्टी भ्वय् नःपिन्सं हे थौं वयात दाल । भ्वय् नयेदुबलय् व मनू बांला । थौं बांमलात । जि ला सुयागुं पार्टी भ्वय् मवनानि ।
झिताः इलय् वासः नयेत अस्पताल कोथाय् वना । टेबुल टेनिश हल न्ह्यःने मनूत दंक मुनाच्वन । छु जूगु जुइ धकाः स्वःवना । अन नाईकेत, सहनाईकेत व भाइ नाईकेत गः गः दु । अबलय् हे ठूलो चौकिं छम्ह मनूयात निम्हेसिनं ल्हाः ज्वना पिने हल । व मनूया तुति खुत्याँय् जुल । खुत्याँय् खुत्याँय् कयाः बुलुहुं नं न्यासि वन । वया ख्वाः नं मनाः वः ख्वालय् दायाःतःगु वँचुसे वँचुसे च्वं । हाकुगु ख्वाःम्ह मनूया ख्वाः झन हाकु खने दयाःच्वन । व मनू ल्ह्वंब्वासे च्वं, खुगूफिट ति तःधी । वं वयागु म्हंया दुरुपयोग याना बःला क्यनाः मनू स्याना वःम्ह खः । नीदँया कैद सजायँ फयाच्वंम्ह खः । नायःनाप ल्वाःपिं मध्ये छम्ह व नं खः । वयात गेटय् पिने यंकल । आः वयात थन जेलय् मतःसे सेन्ट्रल जेलय् छ्वयेत्यंगु जुइ ।
जि अस्पताल कोथाय् वना । अन स्ट्रेचरय् कायया पासा नितेश शाही नाईके दाइयात थसः पाय्का थ्यना तल । वया मिखा फुसि व न्यतालय् घाः दु । छम्हसें वया घालय् वासः तयाः सफा याना च्वन । वया खःगु ल्हाः नं स्याः धयाच्वन । छु जूगु धकाः न्यन । निरञ्जनयात ज्वनाः स्वाहानय् कुहाँ वयाच्वंबलय् ल्यूने मेपिन्सं घ्वाना हयाः ४ नं.या स्वाहानं कुतुंवयाः अंगलय् हानां घाः जूगु धाल । आः वयात पिने अस्पताल यंके त्यंगु दु ।
जि वासः नयाः पिहाँवया । पिने चाःहिला च्वना । थौं लोकतन्त्र दिवस सरकारं थौंया दिंखुन्हू बच्छि कैद माफ बी छेँय् वने दइ धकाः आशा कयाःच्वंपिंं सकसियां ख्वाः ख्यूँसे च्वं । सरकारं पुर्णता मकाःनि उकिं माफि बीगु खँ हे मन्त । बाघौ लिपा जा नयाः वया ।
थौं विदाया दिं । उकिं भेटघाट बन्द । सुं नं छुं खँल्हाय्त ग्याः । कोथाय् वया । थौकन्हय् जित छुं च्वये ब्वने मंमदु । उकिं कोथाय् वया द्यना । द्यनेवं ताउ न्ह्यः वइगु खःला ? घौछि लिपा दनाः पिने वना । थौं सुथय् ल्वाःपिं निम्ह पितिना छ्वल न्याम्हसित । नवांग लामा, रोशन थापा मगर, कैलाश सिंह थुमित न्हापांनिसें दाग तयाःतःगु आः निरञ्जन पौडेल व लक्ष्मण थापानापं चलान याना छ्वल । थौं जिमिगु नम्बरया फोन याये पाः तर सुथय्या घटनां याना फोन यायेगु बन्द जुल ।
मन्दिरय् वनाः पत्रिका स्वयाः ई छ्याना । बजि नयेगु ई जुल । थौं बजि नयेगु छुं मदु । होटलय् छु दय्कूगु दु स्वःवना । होटलय् ममः दय्का तल । प्वाः सुख मदु नयला मनयला जुल । यःयःगु जुइमा न हे नय धकाः नया । कोथाय् वया क्रिकेट म्याच सुरु जुल । क्रिकेट स्वया ई छयाना ।
बहनि जा नः वना । भान्सां खाया ला नकल । ग्याग्यां नया । थौं खाया ला नयागु दिं उकिं ओमशान्ति मवना । क्रिकेट नं पूवंक मस्वया । बीबीसीया समाचार न्यना । साझा सवाल हे मन्यंसे द्यना ।
No comments:
Post a Comment