ख्याःचा
स्व.नाती महर्जन पाक
ने.सं.११३९ पोहेलागा १० बुधबार पिदंगु वयकःया न्यागूगु सफ अधिकार पाखें वयकलं थुगु चिनाखँपाखें २०७२ सालया भुखाचं गुलिसियागु सात्तु काल, गुलिसित सतकय हल धइगु बाँलाक न्ह्यब्वयातःगु दु ।
व ग्यानापुक भुखाय् ब्वःगु दिं
आः तक ल्वःमंके मफुनि जिं
मचात लायलायबुयाः
जित घयघयपूवःगु
कायपिसं क्वथां पिनेनु धकाः
सातुसाः वःगु
म्हाः धायेमते धकाः
ख्वख्वं कलाःचां घ्वातुघ्वाःवःगु
जिं ला सीसां ल्वःमंके फइ मखुनि
व ७२ साल बैशाख १२ गतेया दिं
आःतक ल्वःमंके मफुनि जिं
पासा छम्ह जिथाय् छेँ वयाच्वंगु
ज्या सिधयेका जिके बिदा कयावंगु
लँ बिचय् थ्यंबलय् भुखाय् ब्वया
कर्किया छेँय् दुना ल्हाःगुलिं जि ख्वयागु
आ तक हे जिगु मिखा प्यानावनी
व बैशाख १२ गतेया दिं
आः तक ल्वःमंके मफुनि जिं
सनिवार बिदाया दिं लाःगु
प्रिवार सकलें मुना न्ह्याइपुकाच्वंगु
आकाझाकां भुखाय् ब्वया
द्वलंद्वः मनूत ल्हाना सीगु
सकल जनता त्राही त्राही जूगु
लुमन कि मन आः नं ग्यानावनी
व बैशाख १२ गते या दिंं
आःतक ल्वःमंके मफुनि जिं
व ततःजाःगु छेँ थ्वं काःपिं थें धेधेचूगु
व पुलांगु छेँ बुरापिं थ्वँ कयाः ग्वतुले थें ग्वःतूगु
जिं थ्व घटना गथे याना ल्वःमंके
न्ह्याबलें मिखाया न्ह्यःने न्ह्यःने वयाच्वनी
जितः ला म्हिगः तिनि जक हे जूगु थें च्वनी
व बैशाख १२ गते दिं
आः तक ल्वःमंके मफुनि जिं
छेँ दुना लँय् वये वने थाय् मदुगु
फोन, मोबाइल छुं हे चलय् मजूगु
मन जक पिपिच्याकाः भःभःन्हुया
थः मनूत छुं जुल ला धकाः ग्याना जूगु
व थें ग्याकाः मनूत गबलें मजूनि
अजाःगु ग्यानापुगु दिं गबलें स्वये मनःनि
व बैशाख १२ गतेया दिं
आः तक ल्वःमंके मफुनि जिं
भुखाचं जितः तसकं ख्यानावन
जिगु न्ह्यपुइ हे व ख्याःचा छम्ह त्वःतावन
न्हापा गज्याःम्ह बहादुर धायेकाच्वनाम्ह
भुखाचं काथर, ग्याफरा यानावन
भुखाय्या ख्वाः जक न्ह्यःने न्ह्यःने खनी
न्ह्याबलें वं जितः ख्याः जक ख्यानाच्वनी
व बैशाख १२ गतेया दिं
आः तक ल्वःमंके मफुनि जिं
आः नं याकःचा छेँय् च्वने ग्यानी
मोटर छेँ न्ह्यःने वलकि छेँ सँथें च्वनी
तसकं खापा तीबलय् सः वलकि
भुखाय् ब्वःबलय् सः वःथें च्वनी
न्ह्यागु जूसां हे जितः भुखाय् ब्वःथें च्वनी
जितः थ्व भुखाय्या ख्याःचां गबलें जक त्वःतावनी
म्हंगसय् नं न्ह्याबलें भुखाय् ब्वःगु खनी
थारान्हुया न्ह्याबलें खातां कुतुंवनी
थ्व जिगु न्ह्यपुइ च्वंम्ह भुखाय्या ख्याःचां
न्ह्याबलें छाय् जुइ जितः ख्यानाच्वनी
जिं ला आः तक सिके हे मफुनी
ब बैशाख १२ गतेया दिं
आः तक ल्वमंके मफुनि जिं
न्ह्याबलें भुखाय् ब्वःगु जक लुमंनी
कःसि वनाः निभालय् च्वंवने मछानी
पराकम्प धाःगु वइ ला ध्वाङ्ग सः वइ ला
व हे जक मनय् वयाच्वनी
ध्वाङ्ग सःवःगु सः जक न्हाय्पनय् थ्वयाच्वनी
व ७२ साल बैशाख १२ गतेया दिं
झीसं सिइसां ल्वःमंके फइ मखुनि
आः तकं ग्याना देशय् द्यः चाह्यूवने मछानी
थःगु मदुगु हे बइगलय् जा थुइ ग्यानी
झन म्हिगः म्हीग बहनि नांगां बिस्युंवने मायेक
व हे चन्दाल भुखाय्या ख्याःचा वया ख्याःवल तिनि
द्यनाच्वनाबलय् वया खाता संकवल तिनि
थ्व माघ २२ गतेया दिं
बैशाख १२ गतेयात लुमंक वल तिनि
थुगु ७२ साल बैशाख १२ गतेया दिं
झीसं जिन्दगी दत्तले ल्वःमंके फइ मखुनि ।
ज्वजलपा वाःपौ ल्याः ८२ ने.सं.११३६ सिल्लाथ्व षष्ठी २०७२ फागुण २
No comments:
Post a Comment