चिनाखँ —१.फोटो कपि
ने.सं.११३९ प्वहेलागाः १० बुधवाः पिदंगु “अधिकार” सपूmपाखें
स्व.नाति महर्जन
ज्वजलपा वाःपौ ल्याः६० ने.सं.११३५ गुंलागा कृष्णास्तमी २०७२ भाद्र २० आइतवाः पिदंगु
नेपाःया संविधान पिदनीगु इलय् स्व.नाती दाइ नं चिन्ता कयाः थ्व चिनाखँ च्वयादीगु खः । वय्कःलं गथे चिन्ता कयादिल सीकेत पूवंक ब्वनादिसँ ।
नेतात नेपाःयापिं
गुलि जक छट्टुपिं
संविधान च्वयेगु जाल ह्वाना
धेबा मुंकाच्वंपिं
झिदँ झिंन्यादँ नं
संविधान च्वये मफुपिं
गथे याना देश विकास याइ
धेबा द्वं जक स्वया जुइपिं
इमित वास्ता छुं मदु
देशय् न्ह्यागुसंकट वःसां नं
थुपिंंं बुद्धि दुपिं ला ख हे मखु
थजाःबलय् जनता ह्ययेकेमाः धयागुलि नं
लिपा नं चुनाव जुइगु
थुमिके छाय् विचार मवःगु
कि लिपाया चुनाव दने हे म्वाःल
आः हे कमाय् याये गाःगु
हतपतं ला गन त्वति
इपिं चुनावय् दनेगु
निथाय् निथासं बुतंला
धाँधलि याना सां त्याकीगु
लिपाया चुनावय् जनतां इमित
पत्याः मयाइ धकाः ग्याना
थःथःगु क्षेत्रय् चाह्यू वल आः
च्वका नायोतय् ल्हाः ज्वना
पुलांगु संविधानया फोटोकपि ज्वना
क्यंवल जनतायात
न्हूगु संविधान मस्यौदा धकाः
क्यंवल जनता ध्वं लायेत
ध्वं लायेगु सिबे ला मेगु ज्या
इमिसं आः तक छुं हे याये मसः
जनताया भिं जुइगु ज्याय्
आः तक पलाः छपला नं मतः
बल्ल संविधान मस्यौदा ज्वनाः
जनतायात क्यने धकाः वल
भिंगु जक इमिसं च्वयागु
मभिंगु जनताया कपालय् लाकेत
जनतां विरोध मयाःगु बुँदा
जिमिसं च्वयागु धायेत
जनतां विरोध याक फुक्कं
जनमत हे ब्यूगु ला खः धायेत
झी नेपाःमित नं धात्थें हे खः
छ्यनय् न्ह्यपु हे मदुपिं
गुधानी चाकु नया नं
चाकु सवाः हे मथूपिं
न्ह्योने मखंतले इमिगु विरोध याइ
खनकि तुति भ्वपुइ थें सनीपिं
थ्व हे झीगु कमजोर सिइका इमिसं
देशय् सापारु नखः न्यायेकाच्वंपिं
पहिचान सहितया सिमाङ्कन ला
याये हे म्वाका छ्वल
यःम्ह यक्व हाला च्वं
वहे पुलांगु फोटोकपि पास जुल
मिथिला प्रदेश, नेवाः राज्य धाःगु
म्वायेका हे छ्वल
कोचिला, ताम्सालिङ्ग प्रदेशनं
चुनाव त्याकेत जक धाल
च्यागू प्रदेश याये धाल
सिमाङ्कन याये मफुसा
च्यागू कुचा दयेकीगु जुल
न्वारान याये मफुसां
इमि प्यम्हेसिनं हुकुकम शासन याना
देश चलय् यानाच्वन
समाजवादीया ख्वाःपाः पुया
सामन्ती चरित्र क्यनाच्वन
झिंन्यादँ नीदँ दत झीत
ख्वबि जा नकातःगु
गुम्ह नेता गथे यात धकाः ला
झीसं सीका तयागु हे दु
दक्व पार्टीया सरकार नं
झीसं स्वयेधुन
सुनां जक बांलाःगु ज्या याःगु दु
झीसं ल्ययेधुन
आः संविधान याकनं च्वये धकाः
प्रारम्भिक मस्यौदा क्यां जुल
ग्वन्हु बिका च्वइ छकः स्वये का
आः छकः मौका बिइ हे माल
दंदँ दत संविधान च्वये धकाः
जनता ह्ययेका नयाच्वंगु
समिति, उपसमिति जक दयेका
थः मनूतय्त कमाय् याकाच्वंगु
आः जनतांं न्ह्यलं चायेकु थें च्वना
इमि सातु वन
आःला जनतां बाकि तइमखुत धकाः
संविधान मस्यौदा हयाक्यन
हाकनं संविधान च्वया क्यनेमाःगु
इमिसं विचार यात
अथे जुयाः पुलांगु संविधानया फोटोकपि याना
छगू निगू कातकुत याना मिलय् यात
आः नं याकनं संविधान मदयेकल धाःसा
जनतां बाकि तइमखु
जनतां विद्रोह यात कि हानं
लिपा मन्त्री जुया नयेदइ मखु
आः ला बला नं संविधान
च्वया मक्यन धाःसा
इमित नं जुजु थें हे पितना छ्वयेगु
झीसं ज्यान हे पायेमाःसां
No comments:
Post a Comment