किपूया पत्रकार नवीन महर्जनया म्हसिका

किपूया पत्रकार नवीन महर्जनया म्हसिका

नजरराम महर्जन
किपूया बाकुननी त्वालय् वि.सं.२०२५ सालं अबु हर्ष नारायण महर्जन व मां अष्टमाया महर्जनया च्याम्हम्ह सन्तानया रुपय जन्म जुयादीम्ह खः नवीन  महर्जन ।

वय्कःया प्यम्ह तता व स्वम्ह दाजु दु । वय्कः मचाबलय् हे अबु मदय्का च्वनेमाःगु खः । अय्सां वय्कलं आखः ब्वनेगु त्वःतामदी । वयकःया माध्यमिक शिक्षा किपुली हे जूसां वय्कःया कलेज शिक्षा महेन्द्र रत्न क्याम्पस ताहाचलय जुल ।  वय्कः छम्ह जिम्न्यास्टिक जूगुलिं क्याम्पस वनेगु निंति वय्कः किपुलीनिसें न्यासिहे वनेगु यानादी । वय्कःया ब्वाँय वनेगु, प्याखँ ल्हुइगु तसकं यः ।

मचांनिसें हे मादल थायसःम्ह, तःधिकः जुयावःबले तबला, हारमोनियम सकतां थाय्सल । स्टेज प्रोग्रामतकं यायेगु यानादीगु दु । इन्द्रेणी सांस्कृतिक समाजया स्थापनाकालंनिसें हे वय्कः सक्रिय कलाकार खः ।
ज्ञानमाला भजन हालेगु निसें थीथी थासय् वनां ब्वतिकाः वनेगु नं यानां दी । वय्कलं थःम्हं हे म्ये चिना, लय् तयाःतःगु यक्व म्ये मध्यय् स्वचा म्येचाः पिदने धुंकूगु दु । सुगम संगीत पुचः नीस्वनां वय्कलं सुगम संगीतया प्रचार प्रसार यायेगुली तिबः बियादिल । थौंतकं उगु पुचलं ईलय् ब्यलय् संगीत न्ह्यब्वयेगु ज्याझ्वः यानाच्वंगु दु । वय्कः उज्ज्वल शिशु निकेतन स्कुलया शिक्षक जुया ज्या यानादिल । वय्कः मात्र स्कुलया शिक्षक जक मखु, स्कुल इन्चार्ज व व्यवस्थापन पक्ष नं स्वयादीम्ह खः । वय्कलं नेपालभाषा एकेडेमीं न्ह्याकाच्वंगु नेवाः एफ.एम. १०६.६ लय् पारिश्रमिक हे मकाःसे ज्याझ्वः न्ह्याकामी जुया ज्या यानादिल । २०७२ सालं तःभुखाय् ब्वयाः एफ.एम. बन्द जुल । एफ.एम. हानं संचालन यायेगु निंति जूगु सहलह मूज्याय् वय्कलं न्हापाथें हे ज्याझ्वः न्ह्याकेगु जिम्मा कायेगु बचं बियाःदीगु खः ।

वय्कः छम्ह खेलकुद पत्रकार कथं नं म्हसिका दुम्ह खः । किपुलीं पिदनाच्वंगु कीर्तिपुर सन्देश साप्ताहिक पिदसांनिसें वय्कलं खेलकुद स्तम्भ न्यादँ तक मदिक्क न्ह्याका दिल । वय्कःया कासा ख्यः सम्बन्धि च्वसु ज्यापु महागुथिया ज्यापु पौ पत्रिका व मेमेगु थी थी पत्रिकाय् नं पिदंगु खः । वय्कलं ज्ञान पत्रकारिता पुरस्कार नं त्याकादी धुंकूगु दु । नेवाः पत्रकार राष्ट्रिय दबू नीस्वंगु इलय् वय्कःनं सक्रिय जुयादिल । वय्कः येँ जिल्लाया कार्यकारिणी सदस्य तकं जुयादीगु दु ।

आकाझाकां २०७४ असार ४ गते वय्कःया म्हसुख मन्त । वय्कःयात अस्पताल भर्ना यात । वय्कःयात ब्रेन हेमरेज जूगु जुयाच्वन । अस्पतालय् वासः याकुयाकुं हे ९ गते वय्कलं थ्व संसार त्वःता झाल । वय्कःया तिरिमय्जु, छम्ह काय व छम्ह म्ह्याय् दु ।
नेवाः पत्रकार राष्ट्रिय दबूया येँ जिल्लाया दुजः जुया नं सक्रिय जुयादीम्ह वय्कः पत्रकारिता ख्यलय् नं तसकं सक्रिय नापं न्ह्थनेबहःगु ज्या यानादीम्ह खः ।

सांगितिक ख्यः, शिक्षण पेशा नाप नापं पत्रकारिता ख्यःयात नं ज्वना वनाच्वनादीम्ह वय्कः नविन महर्जन राजनीतिक रुपं नं सचेतम्ह ब्यक्तित्व खः । नेवाः पहिचानया सवालय् नं स्पष्ट दृष्टिकोण दुम्ह वय्कः नविन महर्जन सामाजिक ख्यलय् नं उलि हे सक्रिय जुयादीम्ह खः । नविन महर्जनं किपुलिइ कासा ख्यःया विकासया नितिं नेतृत्वदायी भूमिका म्हिता कीर्तिपुर सामुदायी खेलकुद विकास समाजया मूछ्याञ्जे जुया नं जीवनया अन्तिम इलय् नं सक्रिय जुयादीम्ह खः ।

किपूया न्हूबजाः लागाया गेट लिक्क च्वंगु खेलकुद मैदानयात आःया अवस्थाय् हयेगु नितिं तसकं सक्रिय जुया भूमिका म्हितादीगु खः ।
दँय् दसं किपुलिइ चैत्र २० गते शहिद दिवसया झ्वलय् थीथी खेलकुदया किपाः तकं तया पात्रो पिकायेगु ज्या नं याना वयाच्वनादीम्ह खःसा वय्कः नविन महर्जनया हे सक्रियताय् सामाजय् मेमेगु थीथी कथंया गतिविधि नं न्ह्यानाच्वंगु खः ।