Tuesday, September 20, 2016

कलंकीनिसें नागढुंगातकया न्यासःम्ह स्थानीयवासी जःलाखःला देय्या दुतावासय् शरनार्थी जूवनेगु तयारी

कलंकीनिसें नागढुंगातकया न्यासःम्ह स्थानीयवासी
जःलाखःला देय्या दुतावासय् शरनार्थी जूवनेगु तयारी



ज्वजलपा वाःपौ /
येँ जिल्ला दुनेया कलंकीनिसें थक्वाः जुया नागढुंगा लागा तक च्वंपिं स्थानीयवासीत थ्व इलय् शरणर्थी जूवनेगु सोच तया न्ह्याः वनाच्वंगु दु ।

राज्यपक्षं लगातार रुपं सतक विस्तारया नामय् थःपिन्त दुःख बिया वयाच्वंगु अले राज्य पक्षलिसे ल्वाये मफुगु अवस्थाय् अनसन च्वनेगु व जःलाखःला देय्या नेपालय् च्वंगु दुतावासय् शरणार्थीया रुपय् च्वना ग्वहालिया नितिं इनाप याःवनेगु लँपु बाहेक थःपिंके आः छुं हे कथंया लँपु मन्त धकाः पीडित थक्वाःया नेवाः ख्यःया न्ह्यलुवाः शान्तप्रकाश श्रेष्ठं धयादीग दु । थःपिन्त विना मुआब्जा राज्यपक्षं निजी जग्गा व छेँ तकं कया सुकुम्वासी यानाच्वंगुलिं थ्व इलय् शरणार्थी जूवनेगु मानसिकता अप्वः पीडित मनूतय्सं तयाच्वंगु वय्कलं कनादिल ।

सर्वोच्च अदालतया आदेशयात तकं बेवास्ता याना विदाया दिनय् छेँ च्वनाच्वंपिन्त पितना धमाधम छेँ थुनेगु ज्या यानाहःगु अवस्था दु धयादिसें राज्य पक्षलिसे ल्वायेत माःगु कथंया आत्मबलनिसें शक्ति तकं स्थानीय जनताया मदुगुलिं थ्व इलय् आन्दोलनयात न्ह्याके तकं मफयाच्वंगु खः धकाः श्रेष्ठं धयादिल ।
थ्व इलय् आन्दोलन याना सरकारलिसे ल्वायेगु क्षमता मदुगु, स्थानीय पीडित मनूतय्त साथ बिइपिं मदुगु, थःगु हे देय्या नागरिक नं मेगु देय्या नागरिक थें जुइक ब्यवहार यानाच्वंगु, राज्यं थःपिन्त नागरिकया तकं ब्यवहार मयाःगुलिं आः थःपिं शरणार्थी जुल धकाः घोषणा याना वनेत बाध्य जूगु दु धयादिल ।

राजनीतिक पार्टीया नेतात जक मखु स्थानीय नेता व कार्यकर्तातय्सं अले संचार ख्यलंनिसें नेवाः ख्यलं तकं माःगु कथं थःपिनिगु नितिं माःगु कथं ग्वाहालि मयाःगु अवस्थाय् आः न्यासःम्हसिबें अप्वः पीडित स्थानीय नेवाःत आः जःलाखःला देय् भारत वा चीनया नेपालय् च्वंगु दुताबासय् वना थःपिं शरणार्थी जुल धकाः लिखित रुपं पेश यायेगु अले ग्वाहालिया नितिं इनाप यायेगु कथंया तयारी आन्तरिक रुपं जुयाच्वंगु दु धकाः शान्तप्रकाश श्रेष्ठं धयादिल ।

छुं ई लिपा हे पीडित मनूतय्गु दथुइ सहलह ब्याका थःपिं शरणार्थी जुल धकाः घोषणा यायेगु जक ल्यंदनि धयादिल । अथे थःपिं शरणार्थी धकाः घोषणा यायेगु अवस्थाय् नेपाःया नागरिकता तकं परित्याग यायेगु ला कि मयायेगु धइगु बारे नं सहलह जुयाच्वंगु दु धयादिल । छथ्व पीडित मनूतयसं थ्व इलय् अनसन च्वनेमाः धकाः धयाच्वंगु दु धयादिसें तर अप्वः पीडित मनुत धाःसा शरणार्थीया रुपय् घोषणा याना वनेमाः धइगु पक्षय् दु धकाः तकं वय्कलं धयादिल ।

आः छुं दिं लिपा हे शरणार्थी जुल धकाः घोषणा याना वनेगु नितिं सहलह जुयाच्वंगु दु धकाः तकं वय्कलं धयादिल  । लुमंकेबहःजू कलंकी नागढुंगा सतक विस्तार पीडित संघर्ष समिति नीस्वना आन्दोलन याना वयाच्वंगु खःसां आन्दोलनं सशक्त रुप काये मफुगु खः ।

मूल रुपं कलंकीनिसें नागढुंगाय् तक च्वंपिं प्रमुख राजनीतिक दलया नेता व कार्यकर्तातय्सं हे उगु लागाया पीडित जनतायात मानसिक रुपं कमाजोर याना बिइगु, अप्रत्यक्षे रुपं ख्याच्वः बिइगु ज्या यानाच्वंगुलिं नं आन्दोलन माःगु कथं न्ह्याके मफुगु खः धइगु पीडित श्रेष्ठया विश्लेषण खः ।

No comments:

Post a Comment