स्वःनिगलं नेवाःत विस्थापित यायेगु छगू चाल

स्वःनिगलं नेवाःत विस्थापित यायेगु छगू चाल

Jwojalapa Weekly

थगुने २०७२ बैशाख १२ गते व २९ गतेया तःभुखाचं देय्या झिंप्यंगू जिल्लाय तचकं लिच्वः लाकल । उकि मध्ये काठमाडौं जिल्ला कीर्तिपुर नगरपालिका वडा नं.९,१०,११ व १२ वडाय् नं तःधंगु नोक्सान यानाबिल । सलंसः खाः छेँ थुनाबिल । झिंप्यम्ह मनूया ज्यान वन । त्वाः त्वाः हे सखाप जुल ।

न्हिनय्या इलय् भुखाय् ब्वःगुलिं यक्व मनूत छेँनं पिने लाःगुलिं अप्वः धनजनया क्षति मजुल । भुखाचं पिडितपिन्त सरकारं स्वया अप्वः एनजिओ, आइएनजिओ व विदेशय् वनांच्वंपिं पाँगामितसें ग्वाहालि यात । पाँगाय् अप्वः मनूतय् निखा छेँ दु । देसय् दुने पुलांगु छेँ, देसं पिने न्हूगु छेँ, न्हूगु छेँ काय्पिं, छय्पिं, पुलांगु छेँ मांअबु व बाज्या बज्येपिं च्वनीगु यानाच्वंगु ।

सरकारं तहरा दयेकेत झिंन्याद्वः दाँ बिइगु यात । मेथाय् च्वनेदुपिन्त बिइगु मखु । च्वनेथाय् हे मदुपिन्त जक जस्ता न्यायेत बिइगु धाल । व धेबा लिपा सरकारं निगु लख बिइगुली कतय् याइ । आः मकापिन्त लिपतय् छकलं निगु लख बिइ धाल । कासा धकाः निखा छेँ दुपिन्सं व धेबा मकाः अनं लुमुगु लासा न्यायेत धकाः झिद्वः दां बिल । झिंन्याद्वः मकाःपिन्त बिइमखु धकाः मबिल । छुं खँ मदु ।

आः सरकारं छेँ दनेत धकाः धेबा ग्वाहालि याइगु जुल । व धेबा कयाः थःगु भुखाचं थुंगु छेँ दने धकाः आशा कयाच्वंपिं पिडितपिं नकतिनि सरकारं जारी याःगु नियमं हिस्स जुल । उगु सूचं थुुकथं दु ।

१.जिगु छेँ २०७२ साल बैशाख १२ गते व वयां लिपा ब्वःगु लिभुखाचं दुंगु खः ।
२. जिगु मेथाय् गनं च्वनेगु छेँ मदु । जिगु छेँ दुंगु पुनर्निर्माण यायेत अनुदान माग यानागु खः ।
३.जिं थ्व छेँ दनेत मेथाय् गनं नं छुं कथंया ग्वाहालि कयागु मदु ।
४. जि व जिगु छेँजःया निंतिं छेँ दनेगु जग्गा दु ।
५. जिं दनेगु छेँ जिगु नीजि आवास अनुदान वितरण कार्यविधि व थुगु सम्झौता पत्रय् न्ह्यथनातःगु शर्त, मापदण्ड, प्रविधि व गुणस्तर अनुरुप दयेके ।
६.निर्माण सामाग्री न्यायेगु व दकःमि, सिकःमि प्लम्बर, इलेक्ट्रिसियन व मेगु निर्माण सामाग्री व ज्यायाइपिं व्यवस्था यायेगु जिगु जिम्मेवारी जुइ ।
७. जित बिइगु आवास पुननिर्माण अनुदान रकम छेँ दनेगुली हे खर्च याये ।
८.जिगु छेँ दनेत बिइगु अनुदान वाहेक मेगु लागत जिं थप लगानी याना वा सहुलियत कर्जा वा भुकम्प पिडित विशेष आवास कर्जां छेँ दने ।
९. पुननिर्माण ज्याझ्वः कथं बिइगु अभिमुखीकरण व तालिम ज्याझ्वलय् जिं ब्वति काये ।
१०. जिगु छेँ तोकय् याःगु गुणस्तर, मापदण्ड व प्रविधि अनुसार मजूसा जिगु श्रोत, साधन व सामाग्री छ्यला सुधार यायेत मन्जुर दु ।
११. च्वय् बियागु व्यहोरा ठीक जू । मखुगु ठहरे जूसा कानून बमोजिम सहयायेत जि तयार दु ।

थ्व सम्झौता पत्रया नमूना जुल । थ्व सम्झौता यायेत लाभग्राही घरधनीं क्वय्न्ह्यथनातःकथं भ्वँत हयेमाः धयाः तःगु दु ।

क) नागरिकताया प्रमाणपत्र
(ख) जग्गाधनी दर्ता प्रमाणपत्र –लालपुर्जा) व
(ग) सर्भेक्षणया इलय् बिउगु सर्भेक्षण याःबलय् याःगु निस्सा समेत ।

आः सवाल वई । किपूया गधपखाः दुनेया यक्व छेँथुवातय्के लालपूर्जा हे मदुनि । गधपखाः दुने नापी हे मजूनिसा लालपुर्जा गनं वइ ? मेगु च्वय् सम्झौतापत्रय् न्ह्यथनातःकथं मेथाय् गनं छेँ मदु धायेमाः । झी नेवाःतय् काय्पिं छखे च्वनाः मेथाय् छेँ दनाच्वंवनी । थःपिनि छेँया खँ पिने मवनेमाः धकाः मां अबु दतलय् मालपोतय् वनाः अंशबण्डा याइमखु । थुगु कथं छखे च्वनाच्वपिं काय्पिनि न्हूगु छेँ जुया मदुं । पुलांगु छेँ च्वनाच्वंपिं बुराबुरिपिनिगु छेँ दुन । आः व छेँ दयेकेत सरकारयाके ग्वाहालि फोंवंबलय् काय्पिं नाप छखे मजूनि कायपिनि छेँ दु धकाः ग्वाहालि दइमखु धाल । आः इमिसं व छेँ गथे यानाः दनि ? बुँ मिइदुपिनि ला बुँ मिया दनि । छुँ नं मदुपिनि छु याना दनि ?

निखा छेँदुपिनि भुखाचं थुंगु छेँ दनेत सरकारं छुं हे ग्वाहालि याइमखुला ? छु निखा छेँदुपिं नेपाःया नागरिक मखुला ? इमित सरकारं क्षतिपूर्ति बिइमाः ला कि म्वाः ?

पाँगाया धुसि त्वालय् सुचुक दुंगु छेँत गबले दयेके फइ ? थ्व पाताः जूगु छेँ पाताः हे जुयाच्वनीगु जुल

थन अप्वः छेँ दुंगु धयागु झी नेवाःतय्गु हे खः । थुगु कथं नेवाःतय्त विस्थापित यायेगु थ्व छगू चाल खः । थुकी सः तयेमाःला कि म्वाः । थ्व न्ह्यसः थन ब्वलंगु दु । थुकिया लिसः सुनां बिइगु ।