न्ह्याबलें मन स्वां ह्वयेका जुइगु

न्ह्याबलें मन स्वां ह्वयेका जुइगु

—रमेश मान महर्जन
 भुजिन्द पाँगा

थ्व जगतयात भिंकेगु खःसा
सकसिनं उच्च बिचाः यायेमाः
थ्व नुगलंनिसें मथूतले
जीवन सार्थक जुइमखु ।।

अनित्य थ्व संसारे जन्म जुया
दुःख सुख धनि गरिव स्वया
साःगु मसाःगु भिंगु मभिंगु
ज्वनाःवनेगु छुं हे मदु ।।

लोभ मोह त्याग मयायेकं
देसय् शान्ति वइमखु धकाः
उपदेश बियाः उपकार यायेत
अग्रदूत जुया झाःम्ह नं दु ।।

सुखाबति भुवनय् जन्म कायेत
थःगु कर्तव्य यायेमाल
मनू जुयाः मनूतय्त थुइका
जीवन सार्थक यायेमाल ।।

ज्ञान गुणया बाखँ न्यनां
सत्य व धर्मय् च्वने माल
थःगु मन थःम्ह क्वत्यला
भिंगु बांलाःगु ज्या यायेमा ।।

कतः स्येंकेगु मतिं मतःसे
सकसिगुं मन त्याकेगु स्वः
विश्वास थें तःधंगु छुं मदु
मभिंगु बिचाः त्वःता छ्व ।।

बुद्ध धर्म व संघय् वना
मुक्तिया लँपु ज्वनेगु स्व
दान पुन्य सेवा याना
निर्वाणया ज्ञान कायेगु स्व ।।

कतःपिन्सं प्रशंसा यासा जक
थ्व झीगु मनय् स्वां ह्वइ
सुनां झीत कुंखिन धाःसा
इमिगु मन त्याकेगु स्व

मन नं छगू भोतमाली खः
का छ्वंलिसे थहां वनी
ध्रुब सत्य व गुरुत्वाकर्षणं
चाकःहिलकि कुहाँ वनि

पंचशीलया ज्ञान कया
ज्यान बचय् यायेगु स्वयेमाल
लुचातय्गु संगत मयाःसे
फयाफक्व ज्यायाना नयेमाल ।।