स्व. हरिशरणया लुमन्ति पुष्प सदन स्कुलय् चेस कासा जुइगु

स्व. हरिशरणया लुमन्ति पुष्प सदन स्कुलय् चेस कासा जुइगु

ज्ववलपा वाःपौ ÷
किपूया छम्ह समाजसेवी २०७३ असार १० गते मदुम्ह हरिशरण महर्जनया लुमन्तिई पुष्प सदन आवासीय मा.वि. किपू नं चेस धेधें बल्ला कासा याइगु जूगु दु । मंसिर ४ गते विद्यालय प्रांगणय् छगू पत्रकार सम्मेलन याना चेस धेंधेंबल्ला कासा म्हितकेगु जानकारी बियादीगु खः ।

पुष्पसदनया संस्थापक प्रिन्सिपल महेश श्रेष्ठं थ्व धेधेंबल्ला कासा छाय् यायेत्यनागु व हरिशरणया नामं हे छाय् यायेत्यनागु बारे ध्वाथुइका दिल । २०४० सालय् पुष्प सदन स्कुल किपुली नीस्वंगु इलय् हरिशरण महर्जनया ग्वाहालि मदुगु खःसा स्कुल चलय् याये है फइमुखुगु । पुष्प सदन संचालक समितिया दुजः जुया यक्व ग्वाहालि यानादीगुलिं वय्कःया लुमन्तिई थ्व कासा यायेत्यनागु धकाः कनादिल ।

शिक्षक तुल्सी क्षेत्रीं प्रेस विज्ञप्ति ब्वना न्यंका दिल । उगु पत्रकार सम्मेलनय् नेपाल चेस संघया कोषाध्यक्ष व निर्णायक ज्ञानेन्द्र महर्जन, चेस कोच केशव श्रेष्ठ, कीर्तिपुर बुद्धिचाल विकास संघया अध्यक्ष कुलबहादुर महर्जन नापं स्व.हरिशरण महर्जनया निम्ह म्याय्पिं नं दुगु खः । मंसिर १९ व २० गते निन्हुयंक जुइगु उगु कासा निथी कथं जुइगु दु । छगू किपू नगरपालिका दुनेया विद्यालय अध्ययन यानाच्वंपिं विद्यार्थी पिनि दथुइ जुइ । उकी नं सिनियर व जुनियर धाःगु दु ।

कक्षा ६ तकया जुनियर व कक्षा ७ निसें १० तकया सिनियर कथं म्हितकीगु जूगु दु । थुकी छात्रा व छात्रया ब्यागलं ब्यागलं कथं कासा जुइ । थुगु कासाय् उत्कृष्ट न्याम्हसित मेडल, प्रमाणपत्र व सर्वोत्कृष्ट विद्यालय ट्रफी बिइगु जुइ धकाः जानकारी बिउगु खः । थुकी ब्वति काइपिन्सं प्रवेश शुल्क २०० तका बिइमाली ।
अथे हे खुल्ला धेधेंबल्ला कासा नं जुइगु जूगु दु । थुकी ब्वतिकायेत किपू नगरपालिकाय् स्थायी बसोबास यानाच्वंम्ह जुइमाःगु प्रावधान तःगु दु । थ्व कासाय् ब्वति कायेत ल्हापं ५०० तका तयेमाः । न्हापलाःम्हसित झिद्वः तका, ल्यूलाम्हसित ७ द्वःतका व ल्यूयां ल्यू लाम्हसित न्याद्वः तका नापं प्रमाणपत्र बिइगु नं जानकारी बियादीगु दु ।