ज्वजलपा वाःपौ ल्याः १०६ ने.सं.११३६ गुंलाथ्व एकादशि आइतवाः (२०७३ साउन ३० गते)
क्रिएटिभ एकेडेमीया ईन्टरनेशनल स्कुल अवार्ड २०१६ परियोजनाया प्रदर्शनी
ज्वजलपा वाःपौ ÷
गुँलाथ्व दशमी सनिवाः (साउन २९ गते) नयाँबजार, किपूया क्रिएटिभ एकेडेमीं थःगु स्कुलय् छगू प्रदर्शनीया ज्याझ्वःयात । सुथय् झिताः इलंनिसें बान्थि प्यता ४ ताःईत न्ह्याःगु उगु प्रदर्शनी विशेष याना अनया विद्यार्थीत ईन्टरनेशनल स्कुल अवार्ड २०१६ या परियोजना क्यनेत याःगु खः ।
ब्रिटिश काउन्सिलं “ईन्टरनेशनल स्कुल अवार्ड” या नामं छगू पुरस्कारया व्यवस्था याःगु दु । उगु पुरस्कार धेंधेंबल्लाखय् क्रिएटिभ एकेडेमीं नं ब्वति कयाः दच्छि यंक थः विद्यार्थीपिनिसं याना वयाच्वंगु गतिविधि लिधंसाय् उगु सिरपाः लल्हाइगु खः । उकिं क्रिएटिभ स्कुलया गतिविधि क्यनेत याःगु प्रदर्शनी खः ।
उगु प्रदर्शनी विद्यार्थीत गुलि तक सामाजिक व सांस्कृतिक ख्यलय् भ्यलय् पुनाच्वंगु दु धैगु क्यनेगु तातुना अनया विद्यार्थीतसें थौंकन्हे गुंला थाईगु बाजा अले लाखे व ख्याःचाया प्याखँ क्यनेगु याःगु दु । अथे हे धिमे, खिँ, बाँसुरी, धाः थानाः स्वःवःपिन्त मख्ख यायेत ताःलागु दु ।
अथे हे बहुभाषिक, बहुसांस्कृतिक देय् नेपाःया थीथी जात जातिया वसः पुनाःतःपिं विद्यार्थीतसें नेपाः देय्या मौलिक म्हसिइका नं न्ह्यब्वया तःगु खनेदु । थीथी वसःपुनाःतःपिं मस्तसें थीथी क्वथाय् च्वना प्रदर्शनीस्थलय् स्ववःपिन्त लसकुस यानाच्वंगु नं न्ह्याइपुस्से च्वं । अथे हे नेवाःबाहुल्य लागाय् नेवाः थलबल नं छसिंकथं न्ह्यब्वयातःगु दु ।
अथे हे नसा त्वंसा, सिसाबुसात नं न्ह्याइपुस्से च्वंक न्ह्योने हे ब्वयाः तःगु दु । ब्वनामिपिन्त थःगु जीवनय् माःगु हरेक चीजया अनुभव नं अन याकाःतःगु खनेदु । अन ब्वनिपिं विद्यार्थीतसें थीथी झंगःपंछि जनावरतय्गु किपाः च्वयाः तिकतःगु खनेदु । छथ्व विद्यार्थीपिं सिसाकलमं स्केच यानाः थीथी किपाः कियाः स्ववःपिन्त क्यनाच्वंगु दु । गुकिं अनया विद्यार्थीपिनिगु चित्रकला सम्बन्धि ज्ञान उला क्यनाच्वंगु दु ।अथे हे विज्ञान सम्बन्धि, गणित सम्बन्धि स्टल नं अन दु । स्कुलय् मस्तय्त किताबी ज्ञान जक दयां मगाः । किताबी ज्ञानया ल्यूल्यू व्यावहारिक, सामाजिक ज्ञान नं माः धइगु प्रमाणित याना ब्यूगु दु । आशा दु क्रिएटिभ एकेडेमीं आई एस ए सिरपाः त्याकाः कायेत ताःलाई ।
No comments:
Post a Comment