अन्धविश्वासय लिकुनाच्वंगु विज्ञान

अन्धविश्वासय लिकुनाच्वंगु विज्ञान
आङ्सा चाये मज्यू

Add caption

—पन्नारत्न महर्जन—

छ्यनय् पाचुक सँ खाये बलय् छपुइँचा सँ ल्यंकेमाःगु झीगु सामाजिक परंपरा दु । थ्वयात आङ्सा धाइ । आङ्सा गबलें चाये मज्यू धयागु मान्यता दु । थ्व चाःम्हसित सामाजिक रुपं हिस्यायेगु याः ।
आङ्सा ल्यंकेबलय् न्ह्याथाय् ल्यंकूसां ज्यू धयागु जुइमखु । थ्वया थाय् निर्धारण यानातःगु दु । थ्व चसुप्वालय् लाक ल्यंका माः धयागु मान्यता दु । निपुचा जक बाय् तःकले नं ल्यंकी मखु । चसुप्वाः ग्यछिजक ल्यंकेगु याई ।
चसप्वाः म्हया दकलय् क्यातुगु थाय् खः । ह्याउँ मचातिनिबलय् थ्व थासय् ल्हुकु ल्हुकु मिनाच्वनी । उकिं थ्वयात ल्हुकुगाः बाय् ल्हुकुप्वाः धकाः नं धायेगु याः । चिक बुकी बलय् थ्व थासय् चिकं तयाः बुलुहुँ नं पारापारा दाइ । थथे यायां हे थ्व प्वाः जायेकाः बल्लाकेगु याइ । थ्व प्वाः बमलातले छ्यँ छगलं क्यातुया च्वनी । मचाया छ्यँया बान्कि मिलय् मजू थें जूसा चिकं बुकुबुकुं बुलुहँि मिलय् यायेगु थ्व हे बखतय् याइ । थ्वया लागि फुंगा तयेकेगु व मचायात थ्यनेगु नं गुखें यायेमाः उखे याइ ।
चसुप्वालय चिकं तल धायेवं छ्यँ छगलं न्यनाः उसाँय् बांलाइ धयागुु मान्यता व विश्वास दु । थ्वया लागि मचाबलय् जक यायेमाः धयागु मदु । तःधिकः जुइ धुंकाः नं याः । घ्यःचाकु संल्हु व थज्यागु हे मेमेगु सामाजिक सांस्कृतिक रितिरिवाज बलय् नं चसुप्वालय् मांपिसं चिकं तयेकाः पारापारा दायाः चिकं सुकेगु चलन दु । चसुप्वाः छ्यँया महत्वपूर्ण थ्व जुयाः हे थथे यायेगु चलन यानातःगु खः ।
छ्यनय् बुयावइगु सं छ्यँया रक्षा यानातइ । छ्यनय् सँ मदयेक निभालय् जुइबलय् याकनं पुना वइ । पाचु छ्यँ याना निभालय् च्वने फइ मखु । वा वःसां याकनं प्याइ । छ्यँया महत्वपूर्ण अंग चसुप्वालय् निभालं पुइगु थाय् वाफसं दाइ बलय् उसाँय्यात नकारात्मक प्रभाव लानाः उसाँय् स्यनेफु ।
आङ्सायात सुरक्षित यानातये माः । थ्व सुरक्षित जूसा जक चसुप्वाःयात सुरक्षा यानातये फइ । उकें थ्वयात सार्वजनिकरुपं प्रदर्शन याना जुइमखु । थ्वयात त्वपुइ ज्वलं तपुलि पुनातयेगु याइ । शरिरया छगू महत्वपूर्ण अंगयात रक्षा याना तइगु जूगुलिं आङ्सा चाये मज्यू धयातःगु खः ।