किपूया दीखुु विकास समितिया तःमुँज्या क्वचाल, न्हूगु नेतृत्व ल्यल

 किपूया दीखुु विकास समितिया तःमुँज्या क्वचाल, न्हूगु नेतृत्व ल्यल

ज्वजलपा वाःपौ

किपूया सी गुथिया प्रतिनिधित मुना २०६९ साल मंसीर ४ गते नीस्वंगु किपू दीखु विकास समितिया न्हापांगु तःमुँज्या झिदँ फुना झिँछदँ क्यंगु इलय् जूगु दु । विशेष याना किपूया दीखु लागायात गुगु कथं व्यवस्थापन यायेगु नापं थीथी ज्याझ्वः यायेगु नितिं नीस्वंगु उगु समितिपाखें दीखु लागाय् थीथी कथंया गतिविधि याना वयाच्वंगु खः । 

असोज २० गते शनिवाः किपुलिइ छगू ज्याझ्वःया दथुइ किपू दीखु विकास समितिया न्हापांगु तःमुँज्या याःगु खः । किपू नगरपालिकाया उप मेयर शुभलक्ष्मी शाक्य सुनिताया मूपाहांसुइ जूगु उगु ज्याझ्वलय् वडा नं. ३ या वडा नायो सुविन्द्र महर्जन, सांस्कृतिक समितिया कजि नापं १० नं. वडाया वडा नायो नरेश महर्जन, नेवाः देय् दबू स्वनिगः विशेष प्रदेश समितिया नायो श्रीकृष्ण महर्जन व अधिवक्ता नरेश श्रेष्ठ पाहां जुयादीगु खः । समितिया नायो विरबहादुर महर्जनया नायोसुइ जूगु उगु ज्याझ्वलय् छ्याञ्जे बुद्धिलाल ज्यापुं लसकुस न्वचू बियादीगु खःसा दुजः विरेन्द्र शाक्यं न्ह्याकादीगु खः । 

किपुलिइ जूगु दीखु विकास समितिया न्हापांगु तःमुँज्याया पाहांनिसें मूपाहांपिन्सं नेवाः समाजय् सीगुथिया महत्व नापं गुथिं यायेमाःगु ज्यानिसें सांस्कृतिक पक्षयात व किपुलिइ सांस्कृतिक संरक्षित क्षेत्र ऐन लागू यायेगु सवालयात कया थःथःगु बिचाः प्वंकादीगु खः । उद्घाटन समारोह क्वचाये धुनेवं जूगु बन्दशत्रं न्हूगु नेतृत्व सर्वसहमति कथं ल्यःगु दु । सर्व सहमति कथं ल्यःगु पदाधिकारी व दुजः थुगु कथं दुः 

१) नायः बुद्विलाल ज्यापु, २) न्वकुः हर्ष महर्जन, ३) छयाञ्जेः विरेन्द्र शाक्य, ४) दांभरिः सिद्वि कुमार मानन्धर, ५) दुजः  नरेश खड्गी, ६) दुजः ज्ञान बहादुर देउला, ७) दुजः जित कुमार नापित, ८) दुजः राजभाइ तण्डुकार, ९) दुजः अनिल श्रेष्ठ, १०) दुजः केशरत्न बज्राचार्य, ११) दुजः अधिवक्ता ज्ञान बहादुर महर्जन खः । थरगत रुपं समावेशी जुइगु कथं थीथी गुथिपाखें मेमेपिं आः मुँज्या च्वना मनोनित याइ धकाः धाःगु दु । 

उगु तःमुँज्याय् किपुलिइ दीखुइ सिइ उइगु याना वयाच्वंगु पीस्वंगू सीगुथिपाखें प्रतिनिधित्व याना ब्वति कयादीगु खः ।