येँयाः सिकिमय् हन अष्ट्रेलियाय् नं हनीगु
येँयाःया इलय् येँय् न्यायेकीगु जात्राय् थें कुमारिया रथ सालाः जात्रा याःगु खः । थन येँय् जात्राया इलय् रथय् बिज्याकीम्ह कुमारिया माजुया हे किपा तयाः द्यः खः सालाः जात्रा यायेगु याना वयाच्वंगु दुुसा येँय् जात्रा याइगु दिंकुन्हु हे थन नं येँयाः जात्रा याइ । सिक्किमय् येँय् जात्रा याइम्ह कुमारिया हे किपा रथय् बिज्याकाः रथ सालाः जात्रा यायेगु याना वयाच्वंगु दु ।
येँय् थें जीवित व्यक्तियात कुमारिया रथय् मतसे येँय् जात्रा याइम्ह कुमारि माजुया हे किपा रथय् तयाः जात्रा यायेगु याना वयाच्वंगु खः । लिसें जात्राया इलय् लाखे, अष्टमातृका प्याखं नं पिथंगु खः । सिक्किमया आपालं नेवाःतय् सहभागिता दुगु जात्राय् धिमे बाजं व थीथी प्याखं नं पिथंगु खःसा सिक्किमया थीथी लागा परिक्रमा याःगु खः ।
येँय् च्यान्हुयंकं नखः हनीगु खःसा सिक्किमय् धाःसा छन्हु जक येँयाः हनेगु याना वयाच्वंगु दु । अथेखःसां येँयाःया छुं छुं ज्याझ्वः मेगु निन्हुतक नं हनेगु याना वयाच्वंगु दु ।
सिक्किमय् येँयाःया आपालं गतिविधि येँय् हनीगु नखःथें जूसां थन यःसिं थनेगु, व क्वःथयेगु उपाकू वनेगु, वंघः आजुद्यःयात थें छाय्पीगु, दशअवतार क्यनेगु थेंज्याःगु ज्याझ्वः धाःसा जुइमखु । सिक्किमय् स्वीन्याद्वलं मल्याक नेवाःत च्वना वयाच्वंगु सिक्किम निर्वाचन आयोगया तथ्यांक दु । उकीमध्ये येँयाः जात्राय् च्याद्वः निसें झिद्वःया ल्याखय् नेवाःतय्सं सक्रिय रुपं ब्वति कायेगु याना वयाच्वंगु दु । सन् २००० निसें सिक्किमय् येँयाः हनेगु शुरु याःगु खःसा सन् २०११ निसें सिक्किम राज्य सरकारं येँयाःया लसताय् सार्वजनिक रुपं विदा बिया वयाच्वंगु दु ।
गुथि अस्ट्रेलियां येँयाः हनीगु
अक्टोबर १ तारिख आइतवाःकुन्हु क्रसग्रोव हल क्लोभेल्ली पार्कय् येँयाः नखः हनेत्यंगु खः । गुथि साउथ अस्ट्रेलियाया लिउछ्याञ्जे सजिन प्रधानांगयाकथं येँयाः जात्राय् मुख्य आकर्षणकथं कुमारि जात्रालिसें धिमे बाजं, लाखे प्याखं, पुलुकिसिया आकर्षणत दइ । विशेष यानाः येँयाः समय्बजिया नखः जूगुलिं समय्बजिया ब्वज्या नं जुइगु जानकारी वय्कलं बियादीगु दु ।
थ्व बाहेकं वज्रयान धर्मय् आधारित नेपालमण्डलया प्राचीन शास्त्रीय प्याखं कथं कयातःगु चचाप्याखं कुमारि, वज्रयोगिनी, मंजुश्री, पंचबुद्धया प्याखं नं जात्राया झ्वलय् न्ह्यब्वइगु जूगु दु ।
नेपाःया प्राचीन सभ्यतालिसें नेवाः समुदायया सम्पदा, कला, संस्कृतियात विश्वय् म्हसीका बीगु नापं न्हू पुस्तायात नं जानकारी बीगु ल्याखं नेपाःया हे बिस्कं म्हसीका व सांस्कृतिक महत्वं जाःगु येँयाः नखः हना वयाच्वनागु संस्थां जानकारी बिउगु दु । सन् २०१५ य् नीस्वंगु गुथि साउथ अस्ट्रेलियां नेवाः कला, संस्कृतिया संरक्षण, संवद्र्धन व प्रवद्र्धन यायेगु ल्याखं थीथी नखःचखःया लसताय् थुकथंया थीथी गतिविधि याना वयाच्वंगु दु ।
No comments:
Post a Comment