किपूया ऐतिहासिक देय् पःखाः दयेकेगु प्रतिबद्धता

किपूया ऐतिहासिक देय् पःखाः दयेकेगु प्रतिबद्धता

ज्वजलपा वाःपौ
पृथ्वी नारायण शाह तत्कालिन अवस्थाय् किपूमितलिसे निक्वःतक बांमलाक्क पराजित जूगु धकाः इतिहासय् उल्लेख जुयाच्वंगु दुसा अबले पृथ्वी नारायण शाहया फौज पराजय जूगुया मूल कारण धइगु किपूया देय् पःखाः खः ।

किपू चाकः हिइक दयेकातःगु किपूमितय्सं गःपःखाः नं धायेगु याना वयाच्वंगु देय्पःखाः किपूया मल्लकालिन पःखाः खःसा उगु पःखाः पुनः निर्माण यायेफत धाःसा पर्यटनया दृष्टिकोणं नापं ऐतिहासिक दृष्टिकोणं तकं तसकं महत्वपूर्ण ज्या जुइ धकाः सरोकारवालातय्सं धयादीगु दु । किपू नगरपालिकाया मेयर रमेश महर्जननिसें किपू नगरपालिका वडा नं. २ या वडा अधयक्ष रमेशमान डंगोल, वडा नं. १० या वडा अध्यक्ष अमन महर्जन, देय् पःखाःया नितिं दयेकूगु कार्यदलया कजि किपू नगरपालिकाया कर्मचारी अनुज प्रधान लगायतयापिन्सं देय् पःखाः दयेके हे माःगु खँय् बः बियादीगु दु ।

नेवाः एफ एम अनक मिडिया प्रालिया ग्वसालय् शनिवाः जूगु सहलह मुँज्याय् उगु कथंया बिचाः प्वंकेगु ज्या जूगु खः । नेवाः एफ एम अनक मिडिया प्रालिया नायः नविन महर्जनया सभापतित्वय् उगु ज्याझ्वः नेवाः एफ एमया ज्याकू नेपालभाषा एकेदेमिइ जूगु खः । नेवाः एफ एमया प्रवन्ध निर्देशक नापं नेवाः पत्रकार राष्ट्रिय दबूया नायः श्रीकृष्ण महर्जनं लसकुस न्वचू बियादिसें देय्पःखाःया महत्वयात कया कुलादीगु खः । नेवाः एफ एमया जन सम्पर्क प्रमुख विरेन्द्र विणु शाक्यं न्ह्याकादीगु उगु सहलह मुँज्याय् प्रा. डा. तुयुबहादुर महर्जन, प्रा. डा. शिवशरण महर्जन, कार्यदलया दुजःपिं कमलेश महर्जन, विजय महर्जन, अथे हे केशरत्न बज्राचार्य, टिकाराम महर्जन, वीरबहादुर महर्जन, रविन्द्र बहादुर प्रधान, राजमान महर्जन, बुद्धिलाल ज्यापु, ज्ञान बहादुर महर्जन, नरेन्द्र महर्जन, ज्ञानबहादुर द्यःला, नविन जोशी, जुजुभाई महर्जनपिन्सं नं न्वंवानादीगु खः ।

उगु इलय् आःया अवस्थाय् किपूया देय् पःखाः नाप स्वानाच्वंगु ध्वाखा गन गन मदुनि अन अन दयेकेमाःगु, ध्वाखा नाप नापं देय् पःखाःया अवशेष ल्यंकेफुथाय् ल्यंकेमाःगु, अले चरणबद्ध रुपं थुगु ज्या न्ह्याका यंकेमाःगु खँय् बः बियादीगु खः । देय् पःखाःया सवालय् नगरपालिकां दयेकूगु कार्यदलं छगू चरणया ज्या क्वचायेके धुंकूगु दुसा आः ज्या न्ह्याकेगु नितिं पहल यायेमाःगु अवस्था वःगु खँय् नं सकलसिनं बः बियादीगु खः ।
उगु ज्याझ्वलय् वंगु बैशाख १ गते खाइसँल्हू कुन्हु ध्यानाच्व हाइकिङय् वनादीपिंन्त मेयर महर्जनं दसिपौ तकं लःल्हानादीगु खः ।