लुम्विनी वने मफुपिनिगु नितिं आः किपुलिइ हे ‘मिनी लुम्बिनी तिर्थस्थल’

लुम्विनी वने मफुपिनिगु नितिं आः किपुलिइ हे ‘मिनी लुम्बिनी तिर्थस्थल’

ज्वजलपा वाःपौ
गौतम बुद्धया जन्मभूमि लुम्बिनीइ वना बोधिबृक्ष व बुद्धया मांया दर्शन यायेत वने मफुपिनिगु नितिं आः किपुलिइ हे छगू कथं ‘मिनी लुम्बिनी’या रुपय् व्यवस्था याःगु दु । नेवाः एफ एम अनक मिडिया प्रालिपाखें किपूया नेपालभाषा एकेदेमिया न्यामासिमा लागाय् दुगु बोधिबृषया क्वसं मायादेवीया मूर्ति पलिस्था यायेवं उगु कथंया व्यवस्था जूगु महसूस यानाहःगु दु ।

शनिवाः बुद्ध जयन्तीया लसताय् न्यामासिमा लागाय् छगू ज्याझ्वःया दथुइ गुंगूगु सताब्दीया मायादेवीया प्रतिमूर्ति किपू नगरपालिकाया मेयर रमेश महर्जनं उलेज्यायासें आः नेपालभाषा एकेदेमिया न्यामासिमा लागा नापं मायादेवीया मूर्ति दुगु लागायता पर्यटकीय गन्तब्य स्थलया रुपय् विकास यायेमाः धयादीगु खः । अनक मिडिया प्रा.लि. नेवाः एफ एमया नायः नविन महर्जनं नेपालभाषा एकेदेमि व किपू नगरपालिकायाया ग्वहालि दत धाःसा उगु थाय्यात मायादेवी पार्कया रुपय् बिकास यायेत तयार दु धकाः धयादिल ।

नेवाः एफ एम अनक मिडियाया प्रवन्ध निर्देशक श्रीकृष्ण महर्जनं लसकुस न्वचू बियादीगु उगु ज्याझ्वलय् किपू नगरपालिकया उप मेयर सरस्वती खड्का, नेपालभाषा एकेदेमिया दांभरी डा. पुस्पराज कर्णीकार, वडा. नम्बर २ या वडा अध्यक्ष रमेशमान डंगोल लगायतपिन्सं न्यामासिमा लागा, नेपालभाषा एकेदेमि व मूर्तिया महत्व नाप नापं गौतम बुद्धया जन्मनाप स्वानाच्वंगु बोधिबृक्षया बंशज सिमा व पर्यटकीय क्षेत्रया बारे चर्चा यानादीगु खः ।
उद्घाटन समारोह याये न्ह्यः विधिपूर्वक पुजा याःगु खःसा नेवाः एफ एमया जन सम्पर्क प्रमुख विरेन्द्र विणु शाक्यं न्ह्याकादीगु ज्याझ्वलय् किपू नगरपालिका वडा नं. १ या वडा अध्यक्ष हर्ष महर्जन, ९ या वडा अध्यक्ष गंगाराम महर्जन, १० या अध्यक्ष अमन महर्जन, नेपालभाषा एकेदेमिया प्राज्ञ नजरराम महर्जन नापं थीथी ब्यक्तित्वपिं पाहां कथं सहभागी जुयादीगु खः ।