नवीन नाप छझाः

नवीन नाप छझाः

कमलेश महर्जन                         Sketch of Nabin Maharjan by Kamalesh

थांबहाः, किपू—१

“लुमंका ख्वया च्वंसा, जिगु ख्ववि पुखू जाई

ख्वबिया मू हे मदु, बरषाया पाखा हाःथें”

मदुम्ह स्वर किन्नरी तारादेवीं हाला दिइगु थ्व म्ये जिगु जीवनय् कित ।

वंगु वा असार ३ गते सुथय् ९ बजे मंगल स्कुलय् छन्त तापाक खंगु हे झीगु लिपांगु नजर जुइ धकाः छं ला मधाल म्वाल भगवानं ला जित न्ह्यलं चायेका बिइमाःगु खः, अथे नं मजुल । छ म्ह मफया च्वंगु इश्वर मुनिं सरं त्याँलय् स्कुलया बसय् च्वनां वःम्हं धया जक जिं सिल । असार ६ गतेया दिं स्कूल छुट्टी जुइ खतं तप्यंक वीर अस्पतालय् वया छंगु ख्वाः छक स्वयेगु आःशं बहनी ७ बजेतक पिया च्वना नं चूमलात, द्यापलाःगु इच्छा कुबिया छेँ लिहाँ वया । भिं उसाय्या लागि भगवानयाके कामना याना नं जिगु बिन्ति भगवानं न्यनां मबिल, बरु असार ९ गते बहनी ९ बजे छपासः ख्वबि ज्वना छंगु नश्वर देशयात नाप लायेगु उजं बिल । अभागि थ्व निगः मिखां न छन्त स्वय्फु न ल्हातं थिइफु, मन चिइ मफया छेँ लिहां वया, चुरोट निपु पासा कया चा कतय् याना । चुरोटया कूँ छंगु किपाः च्व च्वं, अतितया खँ लुमंकाः न्ह्यलय् झी निम्ह कुलिचिना ।

असार १० गते अर्थात सिथं यंकूगु दिं सकलसित ख्वय्का छ गबलें लिहां मवयेगु कथं सुखावति भुवनय् वनेगु लँ लित । काय् नयनं मिप्वाः च्याका लँपु क्यना बिलसा, नलिनां भावपूर्ण “बा, यो बा” धकाः क्यातुगु सम्बोधन छंगु लँपु तःब्या याना बिल । चौंथीं निम्ह अबोध मचातय्गु भाला कुबिया छंगु लँपु चू लाका ब्यूगु दु ।

पासा नविन, छु द्यःया यल धाय्वं छँ जिमित त्वःता वने ज्यूला ? छ ला याउँक वन, जिपिं गुलि कष्टकरं म्वानां च्वनेमाल स्यूला ? कीर्तिपुर खेलकुद विकास समाजयात गथे याना म्वाकाः तयेगु, छ विना थ्व समाज गथे याना थज्याके ?कीर्तिपुर सामुदायिक वास्केटवल खेल मैदान निर्माण समितिया धिसिलाःगु थां ग्वःतुल, उकिं थ्व समिति टुहुरा जुल, उज्ज्वल शिशु निकेतन एकेडेमीया छगः धिसिलाःगु थां तःज्यात, स्कूलयात अपूर्णीय क्षति जुल । छँ ल्हाः तयातःगु थीथी संस्थात अनाथ जुल । आः छ मदुगु अवस्थाय् थुपिं संस्थात क्वातुक्क थने फैला, थ्व खँ छँ जिमित छुँ नुगःखँ तया वनागु दुला ? छ मदुगु थुगु समिति, स्कूल, पुचः संस्थात माखा मदुपिं खाचात थें जुइगु जुल ।

किजा नवीन झी निम्ह गुब्लेनिसें कुलिचिन थ्व ई जित लुमंके थाकु । जित थौं थें लुमं, क्वाकेबय् मस्तय्त जिम्न्याष्टिक प्रशिक्षण बिया च्वनागु इलय् छ पूmगु ग्वाहालि याःगु बांलाक लुमं जित । दकलय् नुगलय् थ्यूगु खँला राराहिल स्कुलं निलम्बन याना हया छतपत जुया च्वंगु इलय् छं व संघराम छिमिं निम्हेसिनं घालय् मल्हम तया लायेका ब्यूगु जित गब्लें ल्वमंके मपूm । छंगु ग्वाहालिं जि उज्ज्वल स्कूलय् आर्ट टिचर जुया दुहां वयेगु ह्वःत चूलात । उगु स्कुलय् तःदँ तक छंनाप सहकार्य यायेगु अवसर जित वल । कीर्तिपुर खेलकूद विकास समितिया मू दुजः जुया समिति च्वना यायेमाःगु ज्याया आपालं अनुभव जुल । उज्ज्वल स्कूलया ज्या धाये वा खेलकुद समितिया थीथी ज्या यायेगु झ्वलय् छंगु पसलय् च्वना छेँया दुःख सुख खँनाप ब्याकेगु जुल । झीनिम्हे न्ह्यागुं खँ ल्हाना च्वंसां छंगु पसलय् च्वना यक्को ई बियाच्वंगु गुलिसिया सःफाः, मिलय् जुया नुगःमूपिं नं दु ।

झीनिम्ह जक मखु झीनाप प्रदिप महर्जन (प्रदिप सर) छम्ह नं दुःख सुखया खँब्याके ज्याछिंम्ह दुजः थप दु । झी स्वम्हेसियागु मेलमिलाप वा सहकार्य खनां गुलिसिनं झीत स्वमह दाजु(किजा थें धकाः धायेका च्वने नं । तर थौं थ्व खँयात ताःई तक ल्यंका तये मफुत छंगु अकल्पनिय निधनं ।

छ मत्यवं मदया थीथी पुचलय् गुलि घाटा जूगु जुल, वसिवे अप्वः जिगु जीवनय् द्यापं लाःगु दु, व खँ छँ वाःचायेका वनागु दुला ? छँ छक जित नुगलय् ध्वाःथुइक धाःगु दुकि “न्हापां छँ (कमलेश) निइ ब्याहा या अनं लिपा झीसं प्रदिप सरयात छु धायेमाःगु खँ खः उकिइ च्यूता कायेम्वाः” धकाः धाःगु वचन गबलें पू मवंसे थांतिं लात । थ्व खँ जिगु म्हुतुं पिहां वये थाकुई आः । जिगु जीवनय् लिपा तसकं दुःख जुइ मिसा छम्ह मदय्कं मगाः धकाः मिसात चूलाका बिइगु ज्या याना नं छु जुया गथे जुया सुथां मलात । थौं छंगु इच्छ पुवंका नं छँ नाप च्वना रसरंग यायेगु क्षण म्हगसथें जुया वन ।

ला व लुसिथें मिलय् जूथें गबलें गबलें भनाःभन जुया ल्वाये नं माःगु अवस्था दु । गबलें मिटिङ्गय् इलय् मथ्येना, गबलें ज्यायेगु सुथां मलानां ल्वायेमाः । ल्वानां नं छन्हु(निन्हु लिपा हानं छथाय् च्वना ज्या न्ह्याकेगु बानी दु । न्ह्याको हे ल्वापु(ख्यापु जूसां आखिर परय् जुइबलय् व जित, जि वैत मदय्क मगाः । नविनयागु छता खँ जित चित्त बुझय् मजू । खेलकुद समाज पाखें जित २०६९ सालय् सरकारं ब्यूगु प्रतिभा पुरस्कारया बारे स्थानीय पत्रिकाय् बधाई बिइगु खँय् विमत दु । जिं थ्व खँया बारे प्रदिप सरयात तया ज्यू धाल । नविनयात तया मज्यू धैगु खँ वया जित मन खिन्न जुल । तर थ्व खँ उलि तःधंगु खँ मखु छता(निता खँय् च्वय्(क्वय् लाय्फु छुँ मखु । नविननाप लिपा तकं नापं च्वना वनेगु इच्छा दःसा व इच्छा पू मवन, इलं जित पक्षपात याना बिल ।

“छंगु लुमन्ति गबलें नुगः चसक्क स्याइगु,

हिइसे च्वनां कँ हाइबलय् मिखां ख्वबि हाइगु”

खः, मय्जु रत्नशोभां म्ये हालाःतःथें जुल । निफुति ख्वबि हायेका भावपूर्ण बिचाः हायेका च्वना छंगु लुमन्तिइ ।

Published in Kirtipur Sandesh Weekly Issue 303 Date 2074/03/21