मोहनि

मोहनि

—नाति महर्जन
द्यःचपा, पाँगा

वन वन मोहनि वन
च्यान्हु झिन्हु न्ह्याईपुका वया वन
गुलिसितं न्हिका गुलिसितं ख्वयेका
आइकिवं वेगु वचन बियावन ।।

सांसदतय्त लाखौं लाख दाँ पोचीकावन
कर्मतारीतय्त निलाया तलव, बोनस नकावन
सरकारी मनुतय्त सेफ जायेका
थुगुसि मोहनि नं गरीबतय्त साहुजक कुबुईका वन

सांसदतय् छेँ झः झः धाय्का वन
कर्मचारीतय्त लय् लय् तायेका वन
इमित जक धेबा मम् होलेथें होय्का
गरीबयात साहुं क्येंका ख्वय्का वन ।।

सांसदतय् थाय् दंक दुगु खुसि चिनावन
सरकारी हाकिमतय्त भेती बीहःगुलिं गाकावन
गरीबयात जक पुलुपुलु स्वका
खा छम्ह हे न्याय मफय्क थिके यानावन ।।

दक्को नेता हाकिमतय्त न्हिइका वन
गरीबतय् नुगः जक ख्वय्का वन
मोहनि नखःबलय् हे बजार भाः कंटूोल मयाःसे
व्यापारीतसें लुते याका वन ।।

सरकारी मनूतयेत जक भ्वय् नका वन
गरीबतेत धेर ग्वारचा नये मफय्का वन
गरीबं भ्वय् नयेगु धैगु सपना थें जुईक
थुगुसिया मोहनिनं लाः किलोया द्वछि थेंका वन ।।

जाकि बजि दक्कों थिइ मफय्का वन
माय् मू न्याय हे नुगः स्याका वन
सरकारी मनूत व साहुतेत जक भ्वय नका
थुगुसिया मोहनि नं गरीब द्यांलाका वन ।।

वन वन थुगुसिया मोहनि वन
द्वलंद्वः निर्दोष प्राणीया ज्या कयावन
मुखतेत दुर्गामांया नामं हिंसा याका
सकसितं मोहनि नं तमासा क्यना वन ।।