विलाप

साहित्य  चिनाखँ — विलाप

नाति महर्जन
द्यःचपा, पाँगा

मनय् मन्ह्यंक दुःख प्वचिना
काय म्ह्याय् लुमंका ख्वयाच्वना
धेबाया लोभं काय म्ह्याय् लंडन अमेरिका छोया
थःपिं छेँ मृत्यु वैगु लँ स्वयाच्वन ।।

मनय् दुने दुःख कष्टया मिं ह्वानाः ह्वानां च्याका
थौंतक ला जिमिसं सहयाना च्वना
काय म्ह्याय् लिहाँ वैगु लँ स्वस्वं
मनू म्हमसिक मिखा बुलुका च्वना ।।

असह्य दुःख पिडा सहयाना
ख्वबि त्वना न्हिला क्यनाच्वना
पासा भाइ वया हालखबर न्यनकि
थःगु भाग्ययात दोष बिया क्यना ।।

जिमित थथे सनेमफय्क वाना तइगु
सपनाय् हे जिमिसँ गबलें मखना
सपनाय् हे मखंगु दुःख सिइ माल थौं
मस्यू गुगु जन्मे यानागु पापं याना ।।

न्याइथें वइगु थःगु हे किचलं
गबलें गबलें लितु लिना
उखें सालिला थुखें सालिला
ग्याका च्वनेमाल थौं
थःगु हे छेँया क्वथाय् च्वना ।।

दिन दशा धइगु न्ह्याबलें बांलाई धकाः
च्वने मज्यू झीसं घमन्द याना
भाग्य हे फस्वया वनीगु बृद्ध अवस्थाय्
वनेफु थौं खँम्ह कन्हय् मखंक ।।

संपत्ति धइगु द्वं दःसां मगाः
च्वनेमते अप्वः लोभ याना
संपत्तिया लोभय् भुलय् जुया च्वनेमते
जिमिगु ख्वाः स्वये मखनि लोभ लालचं याना ।।

जिपिंला गंगु सिमाथें जुइधुंकल पुता
थौं क्वदलिला कन्हे धाये मफु सुनां
बीत्यंगु सुद्र्योथें ला खःनि जिमिगु जिन्दगी
घौ पलखं वनेफु साः फुना ।।

छिमि न्ह्योने च्वने दःसा जक जिपिं
निदँ प्यदँ म्वानाच्वनी तिनि
मखुसा छिमिगु चिन्तां यानाः जिमित
याकनं हे चिताय् थ्यने यंनि ।।

छिमिगु ख्वाः स्वयेत ल्यंकाः तयागु
जिमिके खालि थ्व सासः छगु ल्यंदनि
लिबाका च्वनेमते पुता याकनं वा
मखुसा ख्वाःस्वये मखंक सासः चःबुनावनी

विदेशय् जक गुलि च्वनाच्वनेगु
बुरा बुरी मांबौ छेँ वाना
थःगु देसय् वया पौरख क्यंवा
मां बौ परिवार सकलें नापं च्वना

सहारा मदय्क म्वानाः च्वनेमाःगु
थ्व जिन्दगी आः छुयायेत जिमित
बृद्ध अवस्थाय् हे सहारा मदुपिं काय म्ह्याय
म्यबलय् माःगु हे छु यायेत ।।