साहित्य — चिनाखँ —तानाज्य नाति महर्जन

साहित्य — चिनाखँ —तानाज्य

नाति महर्जन
जिमिथाय् त्वालय् दु मनू छम्ह बताँ मजूम्ह
मखु व छुं हे ज्यायाना नइम्ह
न्हिच्छि न्हिच्छि मां बौयात दुःखजक बिया
ल्यायम्ह जुइका तक नं हायका नया च्वंम्ह ।।
न्ह्यागु ज्या बोसां मतासु याना च्वनीम्ह
नयेगु ताःलाकिथाय् न्ह्योने च्वनाच्वनीम्ह
जा मनकूतले नये पित्याना सनेमफु धाइगु
प्वाः जायेक नय् धुनकि दने मफुत धाइम्ह ।।
नकूसाँ मज्यू मनकूसां मज्यूम्ह
ज्यामि नायःतय्गु न्ह्येपु हे नइम्ह
ज्या धाःसा आता आता वया
नयेगु धाःसा बाता बाता माःम्ह ।
पाकः धायेत मखु व खँ मसःम्ह
खालि खँ भचा जक बागलँ ज्याम्ह
खँ मसःम्ह नं मखु ज्या मसःम्ह नं मखु वला
पाकः ख्वालं पुयाः गुछा कौला कायेसःम्ह ।।
म्ह स्वयेबले मचाथें च्वंम्ह
जातः धाःसा यक्व पुलांम्ह
त्वालं पिने गनं वने मनँसां
दिल्ली हाँकय याना खँल्हायेमाःम्ह ।।
म्ह स्वःसा स्वकु हाकःम्ह
बुद्धि धाःसा गुकु हाकःम्ह
धुँ फैचा नवल धकाः मखुगु खँल्हाना
मनूतय्त झंग लाना हाय्का तैम्ह ।।
लयता वःसा फय् मफुम्ह
तँ वःसां वँय्थें सनीम्ह
फःसा सकसितं ख्याना वेँपहः याना
ठगे याना नये पल्के थूम्ह ।।
तानाज्य धालकि तँम्वयेकीम्ह
सकसिनं काजि धकाः सतेमाःम्ह
लँ छजु यच्चुक पुना जुइमखुम्हेसिया
ल्यासेतय् नाप ख्याःल्याः जुइ माःम्ह ।।
सुथय् बहनि देगः न्ह्योने च्वनाच्वनीम्ह
देकेवःपिन्त हाय्का च्वनीम्ह
बांलाःपिं ल्यासेत ला खंके हे मज्यू
न वः दुगु थें ल्यू ल्यू जुइम्ह ।।
सकसिनं ब्वबिइका दायेका जुइम्ह
हिसि मदु तानाज्य धायेका जुइम्ह
छम्ह निम्हसेंला दाया बोबिया
नासः गन छं ख्वाः व त्वाः व
लोम्ह धाय्का जुइम्ह ।।
गन गन भ्वय् न्याः स्वःजुइम्ह
भ्वय् न्याःथाय् तक नं जुइम्ह
न्ह्याथाय् नं धायेम्वाः पाहाँ जुया
न्हापालाक वना भ्वय् झोले फेतु वनीम्ह ।।
सकसिनं पृथ्वीयात भार जक धाइगु
नँ खँसः न ज्यासः धकाः हायका तैगु
खालि छ ठगे जक याना नैम्ह
जिमि पुर्वजन्मया साहु छ धाइगु ।।
माँ बौ नं चिना चि मफुम्ह
तिनिख्यलय् तोतातःम्ह दोहँथें च्वंम्ह
मां बौ न्हिच्छि दुःख सिया वइ
व धाः सुप छपु मचिकुसे नयाच्वंम्ह
देशय् गनं मदु वथें बताँ मजूम्ह
ल्हा तुति छ्यं म्हयात मलोम्ह
त्वालय् सकसितँ पाक याना नयाच्वंम्ह
आतकं हे व तानाज्य धाम्ह ।।