नगां ज्ञानमाला भजन खलःया झिंगुक्वःगु दँ मुँज्या

नगां ज्ञानमाला भजन खलःया झिंगुक्वःगु दँ मुँज्या

ज्वजलपा वाःपौ ÷

बुद्ध धर्मया प्रचार प्रसार यायेगु तातुनाः किपूया नगामय् पलिस्था यानातःगु नगां ज्ञानमाला भजन खलः नं म्हिगः थःगु झिंगुक्वःगु दँ मुँज्या तःजिक हन ।

नगांमय् च्वंगु बाघभैरव बैंक्वेटया हलय् खलःया नायः बेखालाल महर्जनया मूपाहाँसुइ, मूपाहां भिक्षुणी अनोजा गुरुमां नं बोधिमत च्याकाः उलेज्या यानादीगु खः । लसकुस न्वचु उपाध्यक्ष भिमसेन महर्जनं बियादीगु । लसकुस म्ये ज्ञानमाला भजन खलः नगांया जःदुजःपिन्सं मंकाः हालादीगु खः ।

चण्डेश्वर महर्जनं न्ह्याका दीगु उगु ज्याझ्वलय् बृद्धा सेवा समिति नायः हीरा डंगोलं नगां ज्ञानमाला भजन खलःनं याना वयाच्वंगु ज्या अले वहे अन्तर्गत बृद्ध सेवा समितिं याना वयाच्वंगु ज्याखँ न्ह्यब्वयादिल । उगु हे ज्याझ्वलय् खलःया आजीवन सदस्यपिन्त दसिपौ इनेगु ज्या नं याःगु खः ।

नगां ज्ञानमाला भजन खलःया वार्षिक प्रतिवेदन सचिव बेखाराम महर्जन व आर्थिक प्रतिवेदन कोषाध्यक्ष विश्व राज महर्जनं न्ह्यब्वयादीगु खः । धन्यवाद न्वचु उपाध्यक्ष अष्टवहादुर महर्जनं बियादीगु खः । अथे हे भिन्तुना न्वचू पाहाँपिं रमानाथ श्रेष्ठ, रमना श्रेष्ठ, कीरण कुमार जोशी, व मूपाहाँ डा. अनोजा गुरुमां नं थःथःगु नुगः खँ प्वंका दीगु खः । अध्यक्ष बेखालाल महर्जनं सभा क्वचायेका दिल । अनं लिपा पाहाँ रमानाथ श्रेष्ठ ज्येष्ठ नागरिकपिन्त हनादीगु खः ।

ज्याझ्वः सुरुजुइ न्ह्यः व क्वचायेका तकं थीथी ज्ञानमाला भजन खलःपिन्सं भजन न्यंकाः दीगु खः ।