किपूया चीथू त्वालय् हाथु हायेकल

 किपूया चीथू त्वालय् हाथु हायेकल

किपूया चिथु त्वालय् नं हाथु भैरव नं दु धइगु न्यनांतःसां अस्तित्व हे मदय् धुंकूगु, सन स्टार क्लबया कुतलं हाथु भैरव अस्तित्वय् वल । स्वदँ न्ह्योनिसें पुलांम्ह मेयर रमेश महर्जनं उलेज्या यानां हाथु भैरव ब्वयेगु ज्या न्ह्यानां च्वंगु दु । थुगुसी नं समय बजि पुन्हि खुन्हु हाथु भैरव पिने तयाः समय छाया तःजिक हन । मूपाहाँ किपू नगरपालिकाया उपमेयर शुभलक्ष्मी शाक्य ‘सुनिता’ व विशेष पाहाँ वडा नं.१० या वडा नायो नरेश महर्जनं त्वारवाः च्याका उलेज्या यानादीगु खः । उलेज्या धुंकाः हना पौ लःल्हायेधुंकाः लाखे प्याखँ हुइकल । लाखे नं समय बजि द्वँय् थिया घारघुर याना बीवं । समयबजि सकसित नं इनां ब्यूगु खः । चिथु त्वालय् च्वंगु सनस्टार क्लबया सक्रिय युवापिनिगु मंकाः कुतलं थ्व ‘हाथु हायेकेगु’ जात्रा न्यायेकेगु नितिं थनी प्यदँ न्ह्यःनिसें हे पलाः न्ह्याकाः वयाच्वंगु खः ।

थीथी थासं थीथी दातापिनिगु आर्थिक ग्वाहालिपाखें यलया बुंगमतिइ हाथु भैरवया कलात्मक मूर्ति दयेकाः छुं दँ न्ह्यः बुंगंनिसें हाथु भैरबयात जात्रा यानाः किपूया १० वडा चिथुत्वालय् च्वंगु सनस्टार क्लब लिक्क च्वंगु १० वडा ज्याकुथिलिसे स्वाःगु फल्चाय् विराजमान याकूगु खः । थथे विराजमान याके धुंकाः हाथु भैरवयात विधिवत् पूजाआजा यानाः प्राण प्रतिस्थापन ज्याझ्वः तकं क्वचायेधुंकूगु दुसा आः वया विधिवत् रुपं उम्ह हाथु भैरवया म्हुतुं ‘हाथु हायेकेगु’ जात्राया शुभारम्भ यायेगु नितिं माःगु सकतां ज्या न्ह्याकाच्वंगु दु ।

किपूया संस्कृति सम्पदा अन्वेषकपिनिगु धापू कथं किपुली न्हापा न्हापा थीथी थासय् हाथु हायेकेगु परम्परा न्ह्यानाच्वंगु व लिपा वया तःदँ न्ह्यःनिसें उगु हाथु हायेकेगु परम्परा तनावने धुंकूगु खः । थुगु हे परम्परायात निरन्तरता बिइगु नितिं व किपूया तनेधुंकूगु मौलिक संस्कृति परम्परायात हाकनं म्वाकेगु नितिं किपू १० वडाया सनस्टार क्लबया संस्कृति परम्पराह्यःमि युवातय्गु पुचलं छगू ज्वःमदूगु पलाः छिइत ताःलाःगु दु । उपिं सनस्टार क्लबया युवापिन्सं किपूया गौरव, नेवाः समुदायया शान, ज्वःमदुगु संस्कृति परम्परायात ल्यंकेगु ज्याय् तःधंगु योगदान याःगु संस्कृति सम्पदा अन्वेषकपिनिगु धापू दु ।ग्वसाः खलः सनस्टार क्लबं नं थ्व परम्परा थनीनिसें निरन्तर रुपं दँय् दसं न्ह्याकाः वनेगु प्रतिबद्धता प्वंकूगु दु ।