चिनाखँ -----अधिकार

चिनाखँ -----अधिकार

नाति महर्जन
द्यःचपा, पाँगा
छतपते जुया नुगः जक खोयका
न्ह्याबलें ग्या चिकु थें जुई मजिल न्हि
झी नेवाःतेत देशं पितनेगु ग्वसा ग्वयाचोन सरकारं
याकनं नेवाःतेसं न्ह्यलँ चायके माल न्हिं ।

नेवाःतेगु वस्ति जक लेया लेया इमिसं
लँ तबाला यायेत छेँ थुना चोंगु खँला छिं
बैंकया ऋण पुले हे मलावँ छेँथुना बिया
हर्त अत्याक जुया मनूत सिनाचोंगु खँ न्योंला छि

सहरे लँ तबाला यायगु बहाना याना
न्हूगु छेँत हे थुना हःगु स्यूला छिं
गामे गामे नं ज्यापुते बुँ दथुँ दथुँ
तब्यागु लँ देका हयाचोंगु खँला छिं

थुमिसं थथे लँ दयकु दयकुं छेँथुना झीत
सहर पितना छोइतिनि न्ही
गामेंनं ज्यापुते हिरा सैगु बँु अधिकरन यायाँ
फोगिं याना पितना छोइतिनि न्हि ।।

आहे झीसं थुकेया विरोध मयात धाःसा
झी नेवाःत नेपालँ पलायन जुई मालीतिनी
थःगु जन्मभूमि मेपिन्सं राजयागु स्वया
नुग दाया खोया वने मालितिनी ।।

थःगु जन्मभुमि पितंका चोने मालकि
नेवाः धका गौरब यायेथाय् मदयावनी
नेवाः धका गौरव यायेथाय् मंतकि
नेवाः धकाः म्वानाचोनेया छु सार दनि

नेतातेगु हक अधिकारया लागि
याकनं हे ल्वावने फय्केमाल न्हि
झी आदिवासी धाःपिं दको छपं जुया
थः पिनिगु अधिकार आःहे कायमाल न्हि ।।

थःगु अधिकारया लागि ल्वायत झीसँ
ज्यान पाय माःसाँ पायमाल नि
इमिसँ यायाथें अत्याचार याका झीसँ
सोझा धायवँ सहयाय फैमखुनि ।।