प्रचण्ड सरकारं अन्तिम इलय् तक नं कुतः याइगु

प्रचण्ड सरकारं अन्तिम इलय् तक नं कुतः याइगु
देउवा नेतृत्वय् दयेकीगु सरकारं प्रदेश व संघीय संसदया चुनाव याइग

समाचार विश्लेषण 
श्रीकृष्ण महर्जन

नेपाली कांग्रेसलिसे पालंपाः सरकारया नेतृत्व यायेगु सहमति याना संघीय गठबन्धनया नं समर्थनय् दयेकूगु प्रचण्ड नेतृत्वया सरकारं चुनाव यायेगु  अन्तिम इलय् तक नं कुतः याइगु जूगु दु । संघीय गठबन्धनलिसे नं सहमतिया आधारय् हे थःगु नेतृत्वया सरकार गठन जूगुलिं संघीय गठबन्धनया माग कथं संविधान संशोधनयात परिमार्जन याना संसदपाखें पारित यायेगु अन्तिम कुतः तक नं वर्तमान सरकारं याइगु अवस्था दु ।

संविधान कार्यान्वयनया नितिं चुनाव यायेमाःगु जुया चुनाव यायेगु धकाः अन्तिम इलय् तक नं धायेमाःगु सरकारया बाध्यकारी अवस्था खः । उकिं संविधान संशोधनया प्रस्तावयात कया परिमार्जन नं यायेगु अले चुनाव नं यायेगु धकाः लगातार रुपं प्रधानमन्त्री नापं माओवादी केन्दया अध्यक्ष प्रचण्डं सार्वजनिक रुपं न्वंवना वयाच्वनादीगु खः । प्रमुख प्रतिपक्ष एमालें थें तप्यंक हे चुनाव जक यायेगु धकाः नं धाये मजिउगु अले आन्दोलनरत संघीय गठबन्धनया नेतातय्सं थें हे संविधान परिमार्जन याना न्हापां संसदं पारित याना जक चुनाव यायेगु धकाः नं धाये मजिउगु अवस्थाय् प्रचण्डं निगू हे खँयात नाप नापं यंकेगु ज्या यानाच्वनादीगु दु ।
थ्व हे झ्वलय् संघीय गठबन्धनया नेतातलिसे जुइगु वार्ता वा सहलहया झ्वलय् प्रधानमन्त्री प्रचण्डं न्हापां संविधान संशोधनया प्रस्तावयात कया परिमार्जन याना संसदं पारित यायेगु धकाः धया वयाच्वनादीगु दुसा अथे हे प्रमुख प्रतिपक्ष लगायत प्रतिपक्ष दलया नेतात नापलाइगु अवस्थाय् चुनाव यायेगु धकाः धयादीगु दु । उकिं प्रमुख प्रतिपक्ष व आन्दोलनरत संघीय गठबन्धनया नेतातय्सं तकं प्रधानमन्त्रीया सार्वजनिक रुपं आलोचना यायेगु नाप नापं थःथःपिनिगु खँ सम्वोधन मयात धाःसा आन्दोलन यायेगु धकाः ख्याच्वः बियादीगु दु । थ्व हे दथुइ कांग्रेसया नेतातय्सं तकं प्रधानमन्त्री प्रचण्डया उगु कथंया भूमिकायात कया सार्वजनिक रुपं आलोचना याना प्रचण्डया कारणं हे चुनाव मजुइगु संभावना अप्वया वल धकाः तकं धायेगु यानाहःगु दु । वइगु माघ महिना तकया दुने प्रदेश, संघीय प्रदेश व स्थानीय तहया निर्वाचन यायेमाःगु संवैधानिक बाध्यकारी अवस्था दुगुलिं आः छगू छगू याना चुनाव याये मफइगु अवस्थाय् स्वंगू हे तहया चुनाव छक्वलं यायेमाः धायेगु तकं यानाहःगु दु । अथे धकाः सरकारं नापं निर्वाचन आयोगं धाःसा उगु कथंया तयारी यानाच्वंगु
मदु ।

सरकार व निर्वाचन आयोगपाखें न्हापां स्थानीय तहया चुनाव हे यायेगु धकाः तयारी कथं न्ह्या वनाच्वंगु दु । स्थानीय तहया चुनावया मिति घोषणा यायेगु जुइ अले चुनाव यायेगु जुइ धकाः थ्व हे फागुनया न्हापांगु वाः तकया दुने बहस जुइगु अवस्था दु नेपाःया राजनीतिइ ।

अनं लिपा स्थानीय तहया चुनाव ब्यागलं कथं याये मफइगु अवस्था ब्वलनी अले स्थानीय तहया चुनाव न्हापां यायेगु बहस क्वचाया प्रदेश व स्थानीय तहया निर्वाचन नाप नापं यायेगु बहस सुरु जुइगु अवस्था वइ । अनं लिपा बैशाख महिना तकया दुने प्रचण्ड सरकारया थासाय् मेगु सरकार हयेगु कथंया खेल सुरु जुइ ।

संसदया दक्ले तःधंगु दलया ल्याखं नेपाली कांग्रेसया सभापति शेरबहादुर देउवाया नेतृत्वया सरकार गठन जुइ । अनंलि संविधान संशोधनया प्रस्ताव परिमार्जन सहित संघीय गठबन्धनया माग छुं छुं दुथ्याका संविधान संशोधन याइ । अले प्रदेश व केन्द्रीय संसदया चुनाव मंकाः कथं यायेगु घोषणा जुइ । स्थानीय तहया पुनर्संरचनाया सवालय् विवाद कायम जूगुलिं प्रदेश व केन्द्रीय संसदया चुनाव यायेत संघीय गबठबन्धन तकं तयार जुइ अले माघ महिनाया न्हापांगु वाः तकया दुने संविधान कार्यन्वयनया नितिं चुनाव जुइ । संघीय गठबन्धनं माग याना वयाच्वंगु प्रदेश अन्तर्गत स्थानीय तह तयेगु ज्या नं जुइ अले चुनाव नं जुइ । अन्ततः अन्तिम इलय् वया चुनाव यायेगु ज्या जुइगु अवस्था अप्वया वःगु दु ।