कोरियाय् म्हपुजा व न्हूदँ तःजिक हन

कोरियाय् म्हपुजा व न्हूदँ तःजिक हन

--अनिता श्रेष्ठ

ने.सं. ११३७ न्हूदँया लसताय् नेवाः पुचः दक्षिण कोरियां ग्वसाः ग्वःगु मंकाः म्हपूजा व भितुंना कालबिल ज्याझ्वः तःजिक क्वचाल । आइतवाः कोरियाया राजधानी सिओलय् च्वंगु नेपाल हाउसय् भिंतुना कालबिल ज्याझ्वः यानाः ने.सं. ११३७ न्हूदँ तःजिक न्यायेकूगु खः ।

नेपाःया मौलिक संवत नेपाल संवत न्हूदँ भिंतुना कालबिल ज्याझ्वलय् कोरियाय् च्वंपिं नेवाः समुदा व नेपाली संघसंस्थाया प्रतिनिधिपिनिगु तःधंगु सहभागिता दूगु खः । ज्याझ्वलय् ग्वसाः खलः व नेवाःत नेवाः संस्कृति न्ह्यब्वइगु वसः पुनाः पाहाँपिन्त लसकुस यायेगु लिसें देउसी भैलो व हुलाप्याखं न्ह्यब्वःगु खःसा नेवाः भ्वय्या नं ग्वसाः ग्वःगु खः ।

कोरियाया नितिं नेपाली दूतावासया कार्यबाहक राजदूत किरण शाक्यया मूपाहाँसुइ न्ह्याःगु उगु ज्याझ्वलय् विशेष पाहाँपिं एनआरएन आइसिसि दुजः विनोद कुँवर व केपी सिटौला, एनआरएन कोरिया नायः राजु क्षेत्री, आदिवासी जनजाति महासंघ कोरिया शाखा नायः चित्रबहादुर मोक्तान, वमेन फर वमेन नायः मल्लिका श्रेष्ठ थकाली झायादीगु खःसा थीथी संघसंस्थाया प्रतिनिधित्व यासें झायादीपिं पाहाँपिं नं ज्याझ्वलय् उपस्थित जुयादीगु खः ।

मूपाहाँ कार्यवाहक राजदूत शाक्यं ताःई न्ह्यःनिसें हनाः वयाच्वंगु नेपाःया मौलिक संवत नेपाल संवतया न्हूदँया लसताय् सकल नेपाःमिपिन्त भिंतुना देछासें न्हूदँया महत्व व प्रचलनया विषयस न्वःवानादीगु खः ।
अथेहे देस विदेशय् च्वनाः नं थःगु संस्कृति, परम्परा व नखः फुक्क जानाः थःथवय् सदभाव इनाः न्यायेकेदूगुलिं लसता प्वंकादिल ।

नेपाल संवतया इतिहास व प्रचनल विषयस डा. ओम सुवालं प्रोजेक्टरपाखें थःम्हं मुंकूगु नेवाः संस्कृतिया विषयस जानकारी बियादीगु खः । ज्याझ्वलय् उपस्थित सकल पाहाँपिन्सं नेपाल संवत १११३७ व स्वन्ति नखःया लसताय् सकलसित भिंतुना बियादीगु खःसा नेपाल संवत परम्परानिसें न्ह्यानाः वयाच्व्ंगु विशेष महत्व दूगु संवत खः व थुकिया इतिहास कुबियाच्वंगु महत्वं जाःगु मौलिक राष्टिूय संवत ध्याकुनय् लानाच्वंगु दुःखया खँ जूगु व थुज्वःगु देय्या नांपाखें हे नीस्वनातःगु मौलिक संवतयात छुं नं जातं स्वनिगलय् जक सीमित मयासे मुक्कं नेपाः राज्यं छ्यलाबुलाय् हयेमाःगुलि राज्यं विशेष ध्यान बिइमाःगु खँय् सकस्यां बः बियादीगु खः ।
नेवाः पुचः दक्षिण कोरियाया नायः कृष्ण मुस्यानया सभापतित्वय् न्ह्याःगु उगु ज्याझ्वलय् लसकुस न्वचू व सुभाय् न्वचू संस्थाया संरक्षक व ज्याझ्वः कजि रमेश श्रेष्ठं बियादीगु खःसा संस्थाया न्वकू राज देसारं ज्याझ्वः न्ह्याकादीगु खः । अथेहे संस्थापाखें शनिवाः सनिलय् दोङ्देमुइ च्वंगु कुमारी भान्छा घरय् मंकाः म्हपूजा ज्याझ्वः नं याःगु खः ।