चिबाखं—निद्वः तकाया सिरपाः

 चिबाखं—निद्वः तकाया सिरपाः

ज्ञानीराजा मानन्धर 

निबन्ध धेंधें बल्ला कासा ज्याझ्वः। नीम्हति निबन्धकार तयेगु ब्वति । दबूली सभाया नायः, मूपाहां व निर्णायक मण्डलया स्वम्ह नापं मुक्कं न्याम्ह हनेबहःपिं बिराजमान जुयाच्वंगु दु । दबू झःझः धाः । दबूली आसन ग्रहन याना च्वनादीपिं सकल हनेबहः पिन्त ग्वसाः खलःया दुजलं खादा न्ययेकल । ह्याउँसे च्वंगु जाकि सिन्हः तिकल । खेँय् सगं बिल । 

छम्ह छम्ह यायां न्याम्ह हनेबहःपिनिगु न्वचूत नापनापं नीम्ह निबन्धकारपिंसं थःथःगु च्वसूत ब्वने सिधयेकल । 

ज्याझ्वः न्ह्याःगु स्वघौ लिपा पाः वल कासाया लिच्वः न्यंकेगु । 

ब्वति काःपिं सकलसिया नुगः भाराभारा मिना च्वन । “ सु न्हाप लाइगु ज्वी .....“

उखेंथुखेंया खँ जुजुं बाघौ लिपा सिरपाया घोषणा नं जुल । 

ज्याझ्वः न्ह्याकामिं धाल “निद्वः तकाया सिरपा न्हाप लाःम्ह छम्हेसित जक हे बीगु ग्वसाःखलःया निर्णय यात हाकुतिनाः हलिमय् गनं मजूनिगु छगू न्हूगु प्रयोग कथं थ्व पालय् नीम्हेसित हे बीगु निर्णय जूगु दु । थ्व ल्याखं म्हतिं सच्छि व दसिपौ मूपाहांया ल्हाःतं लः ल्हायेगु  जुइ । छम्ह छम्ह यानां नां काये । दबुली झायाः थःगु सिरपाः लः ल्हाना कयादीत सकल साहित्यकार पिन्त इनाप याना च्वना“ 

धाःबलय् ब्वति काःपिं निबन्धकार तयेगु भाराभारा मिना च्वंगु नुगः दित । वं वैत स्वत, वं वैत । सिरपाः व दसिपौ इने क्वचायेकाः समय्’बजि नयाः सकलें थःथःगु छेँय् वन । छम्ह निबन्धकारया कलातं छु जुल धयाः न्यंगु । दसिपौ नापं आलु छह्रानि  ज्वंकल ।